Kardinali Tarçizio Bertone përuroi në Romë ekspozitën kushtuar 145-vjetorit të gazetës
“L’ Osservatore Romano”.
(24.10.2006 RV)“L’Osservatore Romano: nga Roma në botë. 145 vjet histori përmes
faqeve të gazetës së Papës” është titulli i eskspozitës, që do të jetë e hapur nga
data 25 tetor deri më 10 nëntor në pallatin Valentini në Romë. Duke e përuruar
ekspozitën, kushtuar 145-vjetorit të daljes së numrit të parë të gazetës vatikanase,
kardinali Tarçizio Bertone, sekretar i Shtetit të Vatikanit, theksoi se ndjehet fuqimisht
nevoja e veprimtarisë dhe e karizmave të laikëve. Ndjekja e ngjarjeve historike
– tha kardinali Bertone - duke sintetizuar veprimtarinë e Gazetës vatikanase, tregon
qartë se Kisha, si në të kaluarën, ashtu edhe në të sotmen, për të përhapur mesazhin
ungjillor dhe për të promovuar idealet e vërteta të lirisë, të drejtësisë dhe të dashurisë
së krishterë, ka nevojë për veprimtarinë, karizmën dhe shpirtin krijues të laikëve.
Falë veprimtarisë së besimtarëve laikë dhe punës së tyre të përkushtuar – theksoi
akoma kardinali Bertone – “L’Osservatore Romano” mundi të bëjë hapat e para e vijon
të ecë ende në rrugën e vet tashmë 145-vjeçare, duke pranuar sfidat kryesore të së
djeshmes e të së sotmes: sfidën e paqes, sfidën e mbrojtjes së njerëzve më të ligësht
e më të përjashtuar nga radhët e shoqërisë si dhe sfidën e promovimit të kulturës
të dialogut. Që nga 1 korriku i vitit 1861 e për 145 vjet me radhë – nënvizoi në
vijim Sekretari i Sekretarisë së Shtetit të Vatikanit – ‘L’Osservatore Romano’ ia
doli mbanesh të ndjekë veprimtarinë e 11 papëve, duke pasur gjithnjë në qendër të
vëmendjes se lindi pikërisht për të mbrojtur papën e Vatikanin në vitet e ndërlikuara
të bashkimit të Italisë e në përfundim të shtetit papnor, për t’u bërë më pas gazetë
e përhershme e Selisë së Shenjtë.