Papa kujton 50-vjetorin e kryengritjes guximtare demokratike hungareze, shtypur me
gjak nga trupat sovjetike.
(23.10.2006 RV)Më 23 tetor 1956 – shkruan Papa në një mesazh – popullit guximtar
të Budapestit, të etur për liri, iu desh të vihej ballpërballë me një regjim që kishte
për qëllim t’i zhdukte vlerat e kombit hungarez. Është ende gjallë kujtimi i ngjarjeve
tragjike që në pak ditë shkaktuan vdekjen dhe plagosjen e qindra hungarezëve dhe trazime
të rënda në mbarë botën, sidomos në Evropën lindore, që vuante nën zgjedhën e regjimit
komunist sovjetik. Në vijim Benedikti XVI kujton edhe katër thirrjet e fuqishme
publike të Piut XII, i cili i kërkoi bashkësisë ndërkombëtare t’i njihte Hungarisë
të drejtat për vetvendosje, në kuadrin e identitetit kombëtar, që garantonte lirinë
e nevojshme. Benedikti XVI kujton edhe se Hungaria, pavarësisht nga persekutimet
shumshekullore, ndërmjet të cilave ai komunist sovjetik, diti të ruajë gjithnjë lidhjet
me Selinë e Shenjtë, pa iu nënshtruar ideologjive kundërshtare.