Пастырскі зварот Апостальскага Візітатара для грэка-католікаў Беларусі з нагоды 410
годдзя Берасьцейскай Царкоўнай Вуніі ( заканчэньне)
У блаславёны час 410-годдзя Берасьцейскай Уніі мы, беларускія грэка-католікі, прагнем
выказаць нашую глыбокую ўдзячнасьць за Айцоўскі клопат аб нашай Царкве ўсьцяж стагоддзяў
Рымскім Архірэям - Найвышэйшым Пастырам Паўсюднай Царквы. Асаблівую адданасьць у веры,
надзеі і любові выказваем Яго Сьвятасьці Папу Рымскаму Бенядыкту XVI.
Нядзелю 8 кастрычніка 2006 адзначаем як дзень асаблівай
малітвы і салідарнасьці са Сьвятым Айцом. У гэты дзень у нашай агульнацаркоўнай
малітве хочам выказаць нашую жывую падзяку таксама і Рымскай Кангрэгацыі Ўсходніх
Цэркваў, якая ад імя Сьвятога Айца клапоціцца пра нашую Царкву. Шчыра просім Госпада,
каб Найдастойнейшага Кардынала Прэфэкта - Яго Блаславенства Патрыярха Ігната Майсея
І Дауда і ўсіх Пачэсных Супрацоўнікаў Кангрэгацыі Ўсходніх Цэркваў захаваў у Сваёй
ласцы і здароўі на многія леты - ad multos annos! За
каштоўную апеку дзякуем усім Апостальскім Нунцыям у незалежнай Беларусі, а асабліва
дзейснаму Прадстаўніку Сьвятога Айца у нашай Краіне – Апостальскаму Нунцыю Высокадастойнаму
Архібіскупу Марціну Відавічу. Пасьля 16-ці гадоў аднаўленьня душпастырскай дзейнасьці
грэка-каталіцкіх парафіяў на Беларусі з асаблівай увагай прымаем ягоныя словы, якія
ён накіраваў да нас у Полацку ў мінулым месяцы ліпені: “У сьвятле Сулучнасьці
сьвятых, узгадваем нашых шматлікіх братоў, якія на працягу стагоддзяў склалі сведчаньне
Ісусу Хрысту на гэтай узьлюбленай зямлі. Сярод іх знаходзяцца: Сьвяты Архібіскуп Полацкі
Язафат Кунцэвіч (+1623), мучанік за Еднасьць Царквы; Святыя манахіні Еўфрасіньня (+1173)
і Параскева Полацкія; Блаславёны святамучанік Мікалай Чарнецкі (+1959). У
гэтай жа групе сьведкаў веры знаходзяцца таксама Слугі Божыя Фабіян Абрантовіч і Андрэй
Цікота - Архімандрыты Марыяне (МІС), загінуўшыя ў сталінскіх турмах за вернасьць Наступцы
Сьвятога Апостала Пятра, Біскупу Рыма - першы ў 1946 годзе, а другі ў 1952 годзе;
Айцец Антон Неманцэвіч, езуіт (SJ), Апостальскі Адміністратар, які загінуў у нацысцкай
турме ў Мінску ў 1943 годзе, а таксама пяцёра Пакутнікаў манахаў-Базыльянаў, што
былі замучаныя ў 1705 годзе ў катэдральным саборы Сьвятой Сафіі ў Полацку ды Біскуп
Чэслаў Сіповіч, марыянін (МІС), Апостальскі Візітатар для беларусаў Замежжа, які памёр
у Лондане ў 1981 годзе – значыць 25 год таму” (Гамілія ў Полацку, 16 ліпеня 2006
г.). Сёньня, мы беларускія католікі ўсходняга абраду, разам з католікамі лацінскага
абраду, падмацаваныя подзьвігам мучанікаў i сьведкаў мінулых стагоддзяў, а асабліва
мучанікаў таталітарных рэжымаў новага часу, асэнсоўваем сваё пакліканьне да супольнага
сьведчаньня веры Хрыстовай. З найвялікшай руплівасьцю хочам ”захоўваць сьвятую
спадчыну сьведчання Ісуса (пар. Адк 12, 17), якое было нам перададзена і якое мы маем
у Сулучнасьці ўсёй Царквы – адзінай, сьвятой, каталіцкай (паўсюднай) і апостальскай”
(пар. Гамілія ў Полацку, 16 ліпеня 2006 г.). Хочам аб’ядноўваць намаганьні дзеля
супольнага абвяшчэньня сучаснаму чалавеку ў Беларусі Божае Праўды праз Адзінства ў
Любові, таму што “Deus caritas est” (Бог ёсьць Любоў).
4. На
працягу стагоддзяў беларускія грэка-католікі шмат разоў атрымоўвалі каштоўную духовую
падтрымку з боку ерархаў, сьвятароў, манахаў і манахіняў, а таксама сьвецкіх вернікаỳ
Лацінскага Касьцёла на Беларусі. З асаблівай удзячнасьцю захоўваем у памяці Слугу
Божага Біскупа Пінскага Зыгмунта Лазінскага. Каштоўную духовую, маральную і арганізацыйную
падтрымку з боку нашых братоў католікаў лацінскага абраду ў Беларусі мы атрымоўваем
і сёньня. Беларуская Грэка-Каталіцкая Царква на працягу стагоддзяў атрымоўвала
таксамашматразовую ды каштоўную духовую падтрымку з боку ерархаў Украінскае
Грэка-Каталіцкае Царквы. У нашай памяці застаецца апека і падтрымка, якую нястомна
аказваў Беларускай Царкве Слуга Божы Мітрапаліт Андрэй Шаптыцкі, а таксама ахвярнае
пастырскае служэньне Блаславёнага мучаніка Ўладыкі Мікалая Чарнецкага. З першых месяцаў
адраджэньня душпастырскае дзейнасьці нашых парафіяў у 1990 годзе мы атрымалі важкую
падтрымку з боку сьветлае памяці Мітрапаліта Уладзіміра Стэрнюка ды іншых Ўладыкаў
УГКЦ. Таму сёньня мы, беларускія грэка-католікі, хочам выказаць нашую глыбокую
ўдзячнасьць як усім каталіцкім ерархам, духавенству і вернікам лацінскага абраду ў
Беларусі, так і ерархам, духавенству і вернікам Украінскае Грэка-Каталіцкае Царквы.
Разам радуемся нашай прысутнасьці ў Паўсюднай Царкве. Ганарымся супольным сьведчаньнем
адзінства ca Сьвятым Айцом Папам Рымскім. Дзякуем Духу Сьвятому, Госпаду і Жыватворцу,
за подзьвіг мучаніцтва нашых братоў, якія за справу адзінства вучняў Хрыстовых пакрылі
расой крыві сваёй нашыя землі. У супольнай малітве хочам праслаўляць духоўны подзьвіг
усіх нашых братоў, як усходняга, так і лацінскага абраду, што спрычыніліся да рэалізацыі
плянаў Божых “і будзе адзін статак і адзін Пастыр” (Ян 10,16). У
малітве дзякуем Госпаду і за ўсю духовую і маральную дапамогу, якую грэка-каталіцкія
Супольнасьці ў Беларусі атрымалі ад беларускіх грэка-католікаў Замежжа, асабліва ад
Беларускае Місіі ў Лёндане, на чале з Апостальскім Візітатарам Дастойным Айцом Мітратам
Аляксандрам Надсанам. Зробленыя ім пераклады літургічных тэкстаў на беларускую мову
ўяўляюць з сябе для беларускіх грэка-католікаў каштоўную крыніцу духовага багацьця.
У духу адказнай веры глядзім сёньня на нашае хрысьціянскае пакліканьне, на
нашае духовае служэньне Беларускаму Народу. Хочам “ісьці наперад з мужнасьцю, якая
паходзіць ад Бога, і з надзеяй, ускладзенай на Яго”. (пар. Гамілія Апостальскага
Нунцыя ў Полацку, 16 ліпеня 2006 г.). Адначасова хочам маліцца за разьвіцьцё Грэка-Каталіцкае
Царквы ў Беларусі, за яе кананічнае ды ерархічнае завяршэньне і за магчымасьць плённага
сьведчаньня аб каштоўнасьці Каталіцкай Сулучнасьці перад усімі хрысьціянамі і людзьмі
добрай волі ў нашай незалежнай Бацькаўшчыне – Беларусі. Хай праз малітвы
сьвятамучаніка Язафата і ўсіх Заступнікаў Беларускага Народу Госпад шчодраблаславіць нашае сьведчаньне
еднасьці і любові. Менск, 8 кастрычніка 2006 году, 410
год пасьля Берасьцейскага Унійнага Сабору.
+Архімандрыт Сяргей (Гаек) Апостальскі
Візітатар для грэка-католікаў Беларусі