Imzot Miliore në OKB-në e Nju Jorkut thekson: lufta kundër terrorizmit nuk duhet të
dëmtojë të drejtat e njeriut.
(17.10.2006 RV)Në luftën kundër terrorizmit nuk duhet të sakrifikohen të drejtat
njerëzore - këtë pohoi imzot Miliore në Asamblenë e 61-të të përgjithme të OKB-së,
duke theksuar se jo vetëm politika dhe ekonomia, por edhe dialogu ndërfetar mund të
kontribuojnë për t’iu kundërvënë logjikës së terroristëve. Terrorizmi dhe ata
që e nxisin duhen luftuar me të gjitha forcat, por duke pasur parasysh që masat e
marra kundër tyre, të mos i shkelin të drejtat fillestare të njeriut. Ky është koncepti
kryesor i fjalimit që mbajti dje kryeipeshkvi Çelestino Miliore, vëzhgues i përhershëm
i Selisë së Shenjtë pranë OKB-së, në Asamblenë e 61-të të përgjithme të Kombeve të
Bashkuara, që vijon punimet në Nju Jork. Lufta kundër terrorizmit – nënvizoi prelati
– duhet të ecë mbi binarët e impenjimeve politike, diplomatike dhe ekonomike të guximshme,
që lehtësojnë situatat e varfërisë, të cilat ushqejnë logjikën e terrorit. Në
planifikimin e masave kundër terrorizmit – pohoi vëzhgues i përhershëm i Selisë së
Shenjtë pranë OKB-së – mbrojtja e të drejtave të njeriut është objektivi kryesor i
gjithë strategjisë, pikërisht sepse janë vetë terroristët të parët, që me nënvleftësimin
dhe moskokëçarjen absolute ndaj jetës njerëzore, e bëjnë plotësisht të papranueshëm
çdo veprim të tyre. E nënvleftësimi i jetës– vërejti imzot Miliore - arrin deri në
përdorimin cinik të njerëzve të pafajshëm dhe të popullsive të tëra si mburojë për
të fshehur e për të mbrojtur terroristët dhe armët e tyre. Kisha, përkundrazi,
synon në adoptimin e një Konvente kundër terrorizmit, me qëllim që strategjia antiterrorizëm
të mos i sakrifikojë të drejtat themelore të njeriut në emër të sigurisë. Sidoqoftë,
për ta luftuar terrorizmin, nuk mjaftojnë as konventat, as masat ligjore e as armët.
Terrorizmi, manifestim kulturor, në kuptimin e antikulturës e të antiqytetërimit,
i lindur nga perceptime të deformuara të realitetit, duhet kuptuar deri në fund, duke
pasur mirë parasysh se rekrutimi i terroristëve është më i lehtë pikërisht atje ku
shkelen të drejtat dhe tolerohen padrejtësitë. Kështu terroristëve u krijohen mundësitë
të paraqiten si mbrojtës të të varfërve e si luftëtarë në betejën kundër padrejtësive.
Prandaj – pohoi prelati – përveç politikës e diplomacisë, për shrrënjosjen e terrorizmit
duhen bërë ndërhyrje ekonomike, që përmirësojnë kushtet e jetesës së popullsive në
gjendje krize, në saje edhe të dialogut ndërmjet feve, që për vetë natyrën e tyre
janë kundër dhunës e në favor të promovimit të kulturës së paqes e të respektit reciprok..