Mbi urrejtjen mund të fitohet me dashuri. Kështu shprehet kardinali Pol Pupard në
mesazhin për festën induiste të Divalit.
(16.10.2006 RV) Sot kryetari i Këshillit Papnor për dialogun ndërfetar, kardinali
Pol Pupard, u drejtoi besimtarëve indù një mesazh urimi për festën e madhe të Divalit.
Festa simbolizon fitoren e së vërtetës mbi gënjeshtrën, të dritës mbi errësirën, të
së mirës mbi të keqen, të jetës mbi vdekjen, të dashurisë mbi urrejtjen. Prandaj në
mesazh vihet theksi mbi temën e dashurisë, e cila duhet t’i lidhë besimtarët e feve
të ndryshme, në përpjekjen për ta kapërcyer urrejtjen dhe mosbesimin, që vijojnë të
përhapen në mënyrë shqetësuese në botën e sotme. Si kujton sulmet e fundit terroriste
në Mumbai, duke u frymëzuar nga Enciklika e Papës Racinger “Deus caritas est”, kardinalit
Pupard i fton të gjithë besimtarët ta mundin urrejtjen me dashuri. Zoti është burimi
dhe përsosja e çdo dashurie – shkruan Kryetari i Këshillit Papnor për dialogun ndërfetar
– dhe në vijim sjell shembullin e së Lumes Nënë Terezë, e cila e shkriu gjithë jetën
duke i dashur të afërmit e duke u shërbyer pa kurfarë interesi të varfërve, falë takimit
të përditshëm me Zotin dhe lutjes së vazhdueshme. Zoti na do të gjithëve pa përjashtim
dhe dashuria e tij është e pakushtëzuar. Ne duhet t’i përgjigjemi duke bashkuar forcat,
duke bashkëpunuar, edhe në projekte të përbashkëta, për t’i përmirësuar kushtet e
jetesës të njerëzve të shtypur, të braktisur, të ligësht, të përjashtuar nga radhët
e shoqërisë. Çdo ditë shikojmë me sytë tanë sa vuan bota, megjithë progresin e arritur
në fushat shkencore e teknike, për shkak të mjerimit shumformësh, si material ashtu
edhe shpirtëror. E është pikërisht ky mjerim që bëhet shkak për lindjen e urrejtjes
ndër zemra, urrejtje që duhet çrrënjosur me dashuri, sepse dashuria lind besimin e
besimi krijon marrëdhënie të sinqerta ndërmjet njerëzve të feve të ndryshme - përfundon
mesazhi.