Në përfundim të Kongresit Botëror të Televizoneve Katolike në Madrid, reflektim i
Atë Federiko Lombardit, drejtor i Sallës së Shtypit, Radios dhe Qendrës Televizive
të Vatikanit.
(13.10.2006 RV)Përfundoi Kongresi Botëror i Televizioneve Katolike, i promovuar
nga Këshilli Papnor i Komunikimeve Shoqërore dhe i organizuar nga kryedioqeza e Madridit,
në kryeqytetin spanjoll. Në qendër të diskutimeve ishin ndryshimet e mëdha kulturore
dhe problematikat që kanë lindur, si pasojë e zhvillimit të vrullshëm teknologjik.
Per një reflektim mbi tematikat që u diksutiuan dhe mbi fuqinë e këtij mjeti për kumtimin
e mesazhit ungjillor në Mijëvjeçarin e Tretë, intervistuam drejtorin tonë përgjithshëm,
Atë Lombardin: Përgjigje: - Gjithçka ka të bëjë me aspektin e njohjes
reciproke, të kontaktit, të inkurajimit, fakti se jemi së bashku të impenjuar për
të njëjtin mision – një numër i madh njerëzish, ndonëse në vende të ndryshme - u arrit
plotësisht. Ishte një atmosferë shumë pozitive, një klimë entuziazmi dhe dëshire për
të ecur përpara. Lindën edhe shumë marrëdhënie bashkëpunimi, më të ngushta ndërmjet
institucioneve që kanë programe të ngjashme, më të përgjithshme ndërmjet të tjerave.
Nga ana ime, vërejta se informacioni i saktë e i përshtatshëm i dhënë gjatë gjithë
shërbimit të Qendrës Televizive të Vatikanit, në dispozicion të të gjitha televizioneve
katolike të botës, e jo vetëm atyre katolike natyrisht, por i drejtuar prej tyre,
ndiqet me shumë interes. Pastaj u bënë edhe shumë propozime, si ai i krijimit të një
qendre shkëmbimi të programeve, në dispozicion të televizioneve të ndryshme. U bë
edhe propozimi për krijimin e një agjensie informacioni në formë televizive, të shkurtë,
të shpejtë e në përdorim të përgjithshëm. Ja këto janë vijat konkrete të punës, që
sigurisht ngjallin shumë shpresa për të ardhmen. Pyetje: - A është e mundur,
pasi keni dëgjuar shkëmbimin e opinioneve dypalëshe e shumpalëshe, t’i jepni një
përgjigje të përgjithshme pyetjes: Ç’ është televizioni katolik? Përgjigje:
- Të them të vërtetën unë jam shumë i matur në këtë drejtim, sepse larmia e realitetit
është tepër e madhe. Por në gjithë këtë larmi, natyrisht vendin e parë e zë pjesëmarrja
në misionin e Kishës, me shërbime të veçanta, që komunikojnë përmes figurave. Mua
më prek gjithnjë thellësisht larmia e realitetit të Kishës, që gjen shprehjen e vet
edhe në fushën e komunikimeve shoqërore. Kjo larmi ka gjithnjë brënda vetes elementin
që çon tek bashkimi e që na shtyn edhe ne t’i shërbejmë, me veprimtarinë tonë, unitetit
universal, përmes pamjeve dhe mesazhit të Atit të Shenjtë. Për mua ka shumë rëndësi
të respektohet si larmia, ashtu dhe veçantia e karizmave, që paraqesin pastaj pasurinë
e krijimtarisë së Kishës. Prandaj them se nuk mund ta mbyll identittin e televizonit
katolik në një kornizë të ngushtë, sepse në vërtetë karakterizohet nga një pasuri
e një larmi e madhe. Identiteti buron kryesisht nga pjesëmarrja e bindur në fenë e
në misionin e Kishës.