Sekretari i Shtetit të Vatikanit, kard. Tarçzio Bertone do të takojë nesër në Vatikan
Kryetarin e Parlamentit të Kosovës, Kolë Berishën.
(12.10.06.RV) Sekretari i Shtetit të Selisë së Shenjtë, kardinali Tarçisio Bertone
do të takohet nesër në Vatikan me Kryetarin e Kuvendit të Kosovës, Kolë Berishën,
i cili që dje ndodhet në Itali. Mbrëmë Kryetari i Parlementit të Kosovësështë takuar
me bashkatdhetarët që banojnë në Milano e rrethina, me prejardhje kryesisht nga Vitia.
Biseda mbi zhvillimet e fundit në Kosovë u pasua nga problemet e emigrantëve dhe nga
premtimi i kryetarit të Kuvendit se do të tregohet më tepër kujdes për ta. I pranishëm
ishte edhe famullitari i Binçës, don Lush Gjergji, i mirënjohur për dëgjuesin tonë.
Vazhdon
në Irak gjendja e vështirë, e cila do të zgjasë edhe për muaj të tjerë pas Ramazanit,
sipas deklaratës së kreut të forcave amerikane në vend, gjeneralit Xhorxh Kesi. Gjenerali
ndodhet në Uashington për bisedime me funksionarë të lartë të ushtrisë, të cilëve
u shpjegoi se mbetet sidomos problematike situata në Bagdad, ku si amerikanët, ashtu
edhe krerët irakianë nuk ndihen të qetë. Sot, në sulme të ndryshme në kryeqytet
kanë gjetur vdekjen 13 veta. Vetëm në sulmin kundër televizionit “Shaabiya” kanë vdekur
11 persona. Emitentja është pronë e Partisë Kombëtare të Drejtësisë e të Progresit,
një formacion i vogël laikësh pa vende në parlament. Në atentat gjeti vdekjen edhe
kreu i partisë. Ndërkaq, dje të panjohur vranë një meshtar siro-ortodoks,
at Paulos Eskandar. Për të krishterët janë ditë të vështira, siç na konfirmon në mikrofonin
tonë, mons. Filip Naxhim i Patriarkatit të Babilonisë së Kaldejve: Meshtarit
i është prerë koka në Mosul. Para se ta vrisnin, na u kërkua një shifër e madhe si
shpërblim e ne ishim të gatshëm të diskutonim me rrëmbyesit e t’u jepnim shumën e
kërkuar. Pavarësisht nga kjo, gjetëm vetëm trupin e tij pa jetë. Është një vrasje,
që u ka futur frikën të gjithë të krishterëve në Irak, katolikë ose jo. Për ta parashikohen
vështirësi të mëdha në jetën e përditshme. Gjëja e parë që mungon është siguria, më
pas mungojnë dritat, ilaçet, mundësitë për punë. Popullsia irakiane përbëhet nga shumë
etni dhe ekziston përshtypja se ka një forcë të errët që dëshiron të krijojë luftë
civile, t’i detyrojë këta njerëz të braktisin vendin, vetëm e vetëm për të shkaktuar
kaos në popullin irakian. Mons. Naxhim konfirmoi edhe rrëmbimin e abuzimet
kundër grave të krishtera. Deri tani rreth 35 mijë të krishterë janë larguar nga Iraku
për në Siri.
Gjithnjë e më e rëndë kriza koreanoveriore.
Qeveria e Piongjangut, sipas burimeve nga Koreja e Jugut, ka ndërmend të kryejë një
eksperiment tjetër bërthamor brenda javës. SHBA paraqitën sot në Këshillin e Sigurimit
të OKB-së një projekt-rezolutë ku parashikohen sanksione të ashpra kundër Koresë së
Veriut. Nga propozimi është distancuar menjëherë Kina, sipas së cilës objektivi i
vërtetë duhet të jetë çmilitarizimi bërthamor i gadishullit korean dhe rifillimi i
bisedimeve me qeverinë e Piongjangut. Masa thjesht ndëshkuese nuk do t’i shërbenin
çështjes.
Boca e artikullit të fundit shkruar nga
Anna Politkovskaja u publikua sot në “Novaya Gazeta”, e përdyjavshmja e opozitës në
Kremlin, për të cilën punonte gazetarja ruse e vrarë të shtunën e kaluar në Moskë.
Në shkrimin e paplotë, kronistja akuzon forcat çeçene filoruse se torturojnë civilë
e persona që vetëm dyshohen të jenë rebelë. Artikulli, i titulluar “Të quajmë terrorist”,
bazohet mbi letrën e një të burgosuri çeçen i detyruar nën tortura të tmerrshme të
pranojë krime që nuk i ka kryer. I burgosuri tregon se është varur në një shtyllë
me duar e këmbë të lidhura, është rrahur e trajtuar me elektroshok e gati i mbytur
me një qese plastmasi në kokë. Detaje fatkeqësisht të njohura edhe për dëgjuesin shqiptar,
i cili nuk e ka harruar Sigurimin e kohës së komunizmit.
Dhoma
e Deputetëve në Francë ka miratuar një ligj që e konsideron krim mohimin e genocidit
të armenëve gjatë sundimit të Perandorisë Otomane. Ligji, i cili duhet të kalojë tani
në Senat, parashikon një vit burg dhe 45 mijë euro gjobë për ata që mohojnë genocidin
e armenëve, ndodhur ndërmjet viteve 1915 e 1923, gjatë të cilit humbën jetën 1,5 milion
vetë. Reagim i ashpër i Turqisë, ministri i jashtëm i së cilës, e ka konsideruar iniciativën
si të papërgjegjshme, të tillë që do të keqësojë marrëdhëniet ndërmjet Parisit dhe
Ankarasë. Turqia nuk e ka njohur kurrë masakrën kundër armenëve si genocid, por ka
mbështetur gjithnjë tezën se ata kanë qenë viktima të luftës civile, pasojë e shpërbërjes
së Perandorisë otomane. Në Francë banojnë rreth 500 mijë armenë, bashkësia më e madhe
e këtij populli në Evropë.
Nuk dihen akoma shkaqet
e përplasjes së avionit të kampionit të bejsbollit amerikan Kori Lidëll me një grataçelë
të Manhatenit. Fillimisht u mendua për një sulm terrorist, por më pas policia sqaroi
se ishte vetëm një aksident, ku humbën jetën dy persona, ndër të cilët vetë Lidëll,
dhe u plagosën 27 të tjerë.
Kuvendi i Shqipërisë
censuron televizionet. Mediat private, sipas një vendimi administrativ nuk mund të
transmetojnë seancat plenare të Parlamentit. Lajmi ka zgjuar edhe interesin e OSBE-së,
e cila ka kërkuar sqarime me anë të një letre zyrtare. Sipas Kuvendit, problemi ka
të bëjë me rregulloren e parlamentit.