U publikua në kanalin vatikanas të internetit varianti përfundimtar i fjalimit të
Papës në Regensburg, i pajisur edhe me shënimet përkatëse.
(10.10.2006 RVPër Kuranin kam
atë respekt që duhet pasur për librin e shenjtë të një feje të madhe”. Këto janë fjalët
që mund t’i lexojmë në shënimin n. 3, i cili sqaron tekstin e fjalimit të njohur që
mbajti Papa Racinger më 12 shtatorin e kaluar. Shënimet, për të cilat pikërisht ditën
kur Papa mbajti fjalimin, u njoftua se do të delnin së shpejti, tashmë janë publikuar;
e jo thjeshtë si shënime, por të pajisura edhe me sqarime të reja, duke pasur parasysh
debatin e zjarrtë dhe polemikat e shumta që vijuan disa ditë ndërmjet Selisë së Shenjtë
e botës myslimane pak javë më parë. Shënimi n. 3, më domethënësi, ka të bëjë me
dialogun ndërmjet perandorit bizantin Manuelit II Paleolog dhe dijetarit persian,
në të cilin i pari njolloste Muhametin; e është pikërisht ky fragment që i ngacmoi
më shumë përfaqësuesit e islamit. Ndërkaq në këtë shënim lexojmë: “Ky citim, për
fat të keq, u kuptua nga bota myslimane si shprehje e qëndrimit tim personal, duke
shkaktuar kështu një zemrim të kuptueshëm. Shpresoj se lexuesi i tekstit tim do ta
kuptojë menjëherë se kjo frazë nuk shpreh vlerësimin tim personal ndaj Kuranit, për
të cilin kam atë respekt që duhet pasur për librin e shenjtë të një feje të madhe.
Duke cituar tekstin e perandorit Manueli II, qëllimi im i vetëm ishte të vija në dukje
lidhjen thelbësore ndërmjet fesë dhe arsyes. Në këtë pikë jam dakord me Manuelin II,
por pa e bërë timen polemikën e tij. Pra nuk kemi të bëjmë fare me një fyerje.
E kjo sqarohet edhe më mirë nga vetë fragmenti aq i diskutuar. Ja ç’shkruhet në të:
“Në bisedën e shtatë të botuar nga profesor Khoury – pohoi në Regensburg Benedikti
XVI – perandori prek temën e xhihadit, të luftës së shenjtë. Sigurisht perandori e
dinte se në suren 2, 256 të Kuranit shkruhet: “Nuk duhet të ketë asnjë detyrim në
punët e fesë”. Ka shumë mundësi që kjo të jetë një nga suret e periudhës fillestare
– siç shprehet një pjesë e specialistëve – në të cilën vetë Muhameti ishte akoma pa
forcë e për më tepër, edhe i kërcënuar. Gjithsesi, vijoi Papa Racinger – perandori
i njihte mirë edhe udhëzimet e mëvonshme që kanë të bëjnë me luftën e shenjtë, fiksuar
në Koran. Pa u ndalur në hollësira, siç janë ndryshimi i trajtimit të atyre që e njohin
“Librin”, dhe të pafeve, ai me një ashpërsi tepër të madhe, që për ne është e papranueshme
– i drejtohet bashkëbiseduesit të vet me pyetjen themelore mbi marrëdhëniet ndërmjte
fesë e dhunës, duke i thënë: “Më trego, pra, ç’të reja solli Muhameti, e do të gjesh
ndër to vetëm gjëra të këqija e çnjerëzore, siç është udhëzimi i tij për ta përhapur
fenë që predikonte me teh të shpatës”. Pikërisht në përfundim të këtij citimi vendoset
shënimi n. 3, që e shpjegon përsëri keqkuptimin, duke sqaruar edhe domethënien e vërtetë
të diskutimit të hapur nga Papa. Perandori – vijon menjëherë teksti – si foli kaq
rëndë – shpjegon arsyet pse i duket krejtësisht e paarsyeshme përhapja e fesë me dhunë.
“Dhuna – pohon Papa Racinger – është në kundërshtim me natyrën e Zotit e me natyrën
e shpirtit. Zotit nuk i pëlqen gjaku – vijon Papa – e të të mos veprosh sipas arsyes,
do të thotë të veprosh në kundërshtim me natyrën e Zotit. Feja është fryt i shpirtit
e jo i trupit. Ai që dëshron t’i prijë tjetrit në fe, duhet të ketë aftësinë të flasë
mirë e të arsyetojë drejt, e jo të përdorë dhunën e kërcënimin. Për ta bindur
një shpirt të arsyeshëm – vijonte citimi i perandorit nga ana e Papës – nuk është
e nevojshme të kesh as krah të fortë, as mjete të tjera për ta goditur tjetrin ose
për ta kërcënuar me vdekje. Pohimi përfundimtar i këtij argumentimi kundër ndërrimit
të fesë me dhunë – vijoi të pohojë Papa - është: “Të mos veprosh në përkim me arsyen,
do të thotë të veprosh në kundërshtim me Zotin”. E pikërisht këtu kemi shënimin n.
5, përmes të të cilit Papa pohon: “E citova dialogun ndërmjet Manuelit e bashkëbiseduesit
të tij persian thjeshtë për të arritur në këtë pohim. E nga ky pohim buron edhe tema
e reflektimeve të mia të mëpasme. Reflektimet e Papës – përfundojmë neve – i drejtohen
posaçërisht botës perëndimore për t’i kujtuar këtë mësim themelor: “Në se arsyeja
dhe feja bashkohen në mënyrë të re, bëhen të afta për dialogun e vërtetë ndërmjet
kulturave dhe feve, dialog – pohon Benedikti XVI – për të cilin kemi nevojë urgjente.