29 верасня, ва ўрачыстасць святых Арханёлаў, ашмянскі касцёл, які носіць тытул святога
Міхала Арханёла, адзначаў свой 100-гадовы юбілей. Святыня не змагла змясціць усіх
– на ўрачыстасці прысутнічалі не толькі парафіяне і вернікі з іншых парафій, але прыбылі
шматлікія госці-пілігрымы з іншых дыяцэзій Беларусі і з-за яе межаў. Ва ўрачыстай
святой Імшы на чале з біскупам Гродзенскім Аляксандрам Кашкевічам удзельнічалі святары
з дыяцэзій на Беларусі, а таксама святары з Польшчы, Літвы, Эстоніі.