Politika e sigurimit të shteteve nuk mund t’i cënojë të drejtat e njerëzve që kërkojnë
strehim politik.
(9.10.2006 RV)Masat për kontrollin e emigrimit të paligjshëm nuk duhet të cënojnë
të drejtat e atyre që kërkojnë strehim” – pohoi Antonio Guterres, Komisioner i lartë
i Kombeve të Bashkuara për Refugjatët, duke kërkuar nga bashkësia ndërkombëtare t’u
garantojë mbrojtje viktimave të dhunës e të persekutimit, posaçërisht në një kohë
kur në shumë shoqëri sundon intoleranca. Në mbyllje të punimeve të Komitetit Ekzekutiv
të Agjensisë së OKB-së për refugjatët mbledhur javën e kaluar në Gjenevë, Guterres,
duke kujtuar klandestinët që kanë hyrë kohët e fundit në Spanjë e në Itali, nënvizoi
se, ndonëse shumica janë larguar nga vendi për shkaqe ekonomike, mbeten njerëz që
kanë nevojë për mbrojtje, pavarësisht nga e drejta e shteteve për ruajtjen e kufijve
të tyre. Në kryeqytetin helvetik ishin të pranishëm delegatët e 70 vende të ndryshme,
ndërmjet të cilëve edhe Vëzhguesi i Selisë së Shenjtë pranë OKB-së së Gjenevës, kryeipeshkvi
Silvano Tomazi i cili, duke kujtuar se sot në botë numrohen 9 milionë refugjatë e
24 milionë të tjerë, që jetojnë si refugjatë brënda vendeve të tyre, ngriti para bashkësisë
ndërkombëtare problemin e domosdoshmërisë së zhdukjes nga harta e botës të atyre që
ai i quajti “njolla të zeza”, dmth të kampeve të refugjatëve e të të shpërngulurve.
Prelati kujtoi edhe një herë se bashkësia ndërkombëtare mund ta shërojë këtë plagë,
duke përdorur vetëm një pjesë të mijëra miliona dollarëve që shpenzon për armatime.