Bota ka nevojë për familje që nuk rrëmbehen nga rrymat moderne kulturore, të frymëzuara
nga hedonizmi dhe relativizmi: këtë theksoi dje, Benedikti XVI në lutjen e Engjëllit
të Tënzot.
(9.10.2006 RV)Martesa dhe familja
ishin dje në qendër të vëmendjes në fjalët e Benediktit XVI gjatë lutjes së parë të
Engjëllit të Tënzot kremtuar në Sheshin e Shën Pjetrit, pas periudhës verore të kaluar
në Kastel Gandolfo. Reflektimi i Atit të Shenjtë u frymëzua nga përgjigjet e Jezusit
për martesën në Ungjillin e së dielës. “Ndjehet nevoja për familje që nuk rrëmbehen
nga rrymat moderne kulturore, të frymëzuara nga hedonizmi dhe relativizmi; përkundrazi,
janë të gatshme ta kryejnë me përkushtim fisnik misionin e tyre në Kishë e në shoqëri”.
Këtë ripohoi Benedikti XVI, duke shtuar: “Të vetëdijshëm për hirin që kanë
marrë, uroj që bashkëshortët e krishterë të ndërtojnë një familje, e cila është e
gatshme të dhurojë jetë dhe e aftë të përballojë, e bashkuar, sfidat e shumta e të
ndërlikuara të kohës sonë. Posaçërisht sot ndjehet fuqimisht nevoja për dëshminë e
tyre”. Mendimi im shkon tek të gjithë bashkëshortët e krishterë – tha Papa
- duke falënderuar së bashku me ta Zotin për dhuratën e Sakramentit të martesës dhe
duke i nxitur të gjithë bashkëshortët t’i qëndrojnë besnikë thirrjes së tyre në
çdo stinë të jetës, ‘në gëzim e në dhimbje, në shëndet e në sëmundje’, siç kanë premtuar
në ritin sakramentor. Benedikti XVI kujtoi se në Ungjillin e djeshëm, atij që
i drejtoi pyetjen në se i lejohet burrit ta ndajë gruan e vet, siç parashikonte norma
e ligjit mozaik , Jezusi iu përgjigj se kjo ishte një leje e dhënë nga Moisiu për
shkak të zemërgurësisë së njerëzve, ndërsa e vërteta mbi martesën nis që në fillimin
e krijimit, kur Hyji – siç shkruhet në Librin e Zanafillës – i krijoi mashkull e femër;
për këtë arsye burri do të lerë të jatin dhe t’ëmën e vet dhe do të jetojë bashkë
me gruan e vet e do të bëhen një trup i vetëm. Njeriu të mos e ndajë atë që e ka
bashkuar Zoti!”. E Benedikti XVI nënvizoi se pikërisht ky plan fillestar i Zotit
kujtohet edhe nga Koncili II i Vatikanit në Kushtetutën Gaudium et Spes, ku lexohet:
“Bashkimi intim i jetës dhe i dashurisë bashkëshortore, themeluar nga Krijuesi, ndërtohet
sipas ligjeve të veta e përcaktohet nga marrëveshja bashkëshortore … duke pasur parasysh
se autor i martesës është vetë Zoti”. Më pas Papa vijoi të nënvizonte se në Nxitjen
Apostolike Familiaris Consortio shërbëtori i Hyjit, Gjon Pali II ka shkruar se Sakramenti
i martesës i bën bashkëshortët dhe prindërit e krishterë dëshmitarë të Krishtit deri
në skajet më të largëta të tokës, i bën misionarë të mirëfilltë të dashurisë dhe
të jetës. Benedikti XVI shpjegoi se ky mision është i drejtpëdrejtë si brënda familjes,
posaçërisht në shërbimin reciprok dhe në edukimin e fëmijëve, ashtu edhe jashtë familjes,
sepse bashkësia shtëpijake është e thirrur të bëhet shenjë e dashurisë së Zotit për
të gjithë. Në vijim Papa foli fjalë inkurajuese, duke theksuar kufizimet njerëzore
por edhe mësimin e bazës. Ati i Shenjtë shpjegoi se ky është mision që familja e krishterë
mund ta kryejë plotësisht vetëm me ndihmën e hirit hyjnor. “Prandaj është
e nevojshme që bashkëshortët të luten pa u lodhur kurrë e të vijojnë përpjekjen e
përditshme për t’i mbajtur premtimet e bëra ditën e martesës. I lutem Zojës së Bekuar
dhe fatit të saj, Shën Jozefit, të ndërmjetësojnë pranë Zotit për të gjitha familjet,
posaçërisht për ata që kalojnë çaste të vështira: “Mbretëreshë e familjes, lutu për
ne!”. Pas lutjes mariane një përshëndetje të përzemërt Papa u drejtoi 350
të rinjve misionarë, besimtarë të famullive dhe anëtarë të shoqatave, lëvizjeve dhe
bashkësive të dioqezës së Romës, të cilët këto ditë, së bashku me disa meshtarë, rregulltarë
e seminaristë, organizuan për herë të tretë misionin e “të rinjve për të rinjtë”,
titulluar “Jezusi në qendër”. “Miq të dashur, ju përgëzoj për impenjimin tuaj
gazmor të predikimit të Ungjillit nëpër rrugë e ndër sheshe, ndër shkolla e spitale
si dhe ndër vendet ku çlodhet rinia romake. Ju nxis ta vijoni këtë stil misionar në
jetën e përditshme, duke përfituar gjithnjë më shumë nga nismat edukative dioqezane”. Ndër
përshëndetjet në gjuhë të ndryshme, kujtojmë urimin frëngjisht, që të rinjtë të rizbulojnë
vlerën e martesës e pastaj, ftesën drejtuar institucioneve publike për të mbështetur
institucionin bashkëshortor e familjar. Në spanjisht Papa u drejtoi një përshëndetje
të posaçme shtegtarëve të Bazilikës të Zojës së Angustias në Granadë. Në polonisht
kujtoi kremtimin e së shtundes të Zojës Rruzare, duke i nxitur besimtarët ta thonë
vazhdimisht Rruzaren shenjte e duke kujtuar se Gjon Pali II ka shkruar: “Me Rruzaren,
populli i krishterë ulet në shkollën e Virgjërës Mari, për të hyrë kështu në kundrimin
e bukurisë së fytyrës së Krishtit dhe në përvojën e thellësisë së dashurisë së tij”.