Shenjtorët e javës së ardhshme sipas Kalendarit kishtar:
(8.10.2006 RV) Sot Kisha
katolike kremtoi të dielën XXVII të kohës gjatë vitit kishtar. Përkujtoi edhe Shën
Pelagenë, virgjër e martire. Nesër, e hënë, do të kremtojë festën e Shën
Dionisit e shokëve të tij, martirë; të Shën Leonardit, meshtar, themelues i Klerikëve
rregulltarë të Nënës së Zotit, dhe të Shën Abrahamit, patriark. Duke i kremtuar,
na lind pyetja më e rëndësishme që duhet t’ia drejtojë vetes çdo njeri: “Ç’duhet të
bëj për të fituar jetën e pasosur?”. Përgjigja është : “Të duash Zotin e të afërmin,
ashtu si na e kujton Benedikti XVI në Enciklikën “Zoti është dashuri”. Të martën
do të përkujtohen Shën Danieli e shokët e tij, martirët e parë françeskanë dhe Shën
Françesk Borgja. Liturgjia e festës së tyre na kujton se Jezusi sigurisht nuk e nënvleftëson
punën e Martës, në shtëpinë e së cilës pret të ushqehet. Duke lavdëruar sjelljen e
Marisë, kërkon të tërheqë vëmendjen mbi rëndësinë e pranisë së Tij e të na kujtojë
se asgjë në botë nuk duhet të na hutojë para dëgjimit të fjalës së Zotit. Shën
Firmini, diakon, Shën Aleksandër Sauli, ipeshkëv i Pavisë dhe i Lumi Gjoni XXIII papë,
që do të kremtohen të mërkurën e ardhshme, na kujtojnë se duke na dhuruar ‘Atynën”,
Jezusi deshi të na mësonte sjelljen e bijve që lidhen ngusht me Atin, me të cilin
bashkojnë vullnetin, ndjenjat, jetën; nga i cili kërkojnë t’u japë bukën e përditshme,
t’ua falë mëkatet, t’u japë jetë, t’i çlirojë nga i keqi. Të enjten
e ardhshme, festa liturgjike e Zojës së Bekuar, Nënës së Kishës, na kujton se po të
besojmë në lidhjen e Atit me bijtë, në bazë të ‘Atynës’, rruga që na çon në takimin
me Zotin do të jetë gjithnjë e lirë: do të na jipet ajo që kërkojmë, do të gjejmë
atë që lypëm, do të na hapet porta ku kemi trokitur. Po a e kemi besimin e duhur për
ta arritur këtë? Të premten e ardhshme Kisha do të përkujtojë Shën Teofilin,
ipeshkëv i Antiokisë. Festa e tij na tregon se Jezusi erdhi në botë për ta çliruar
njeriun nga shejtani. Fitorja e tij është e sigurtë, sepse ai është më i fortë. E
si mund të mos mbajmë anën e tij? Kush e gënjen veten se mund të luftojë i vetem,
jo vetëm që do të bjerë në kthetrat e së keqes, por nuk do të mund të çlirohet më
prej saj. Të shtunën do të kremtohet festa e Shën Kalistit, papë e martir,
që na fton t’i këndojmë Zotit, sepse ai është Hyji ynë, të cilit duhet t’ia dëgjojmë
fjalën e të jetojmë sipas vullnetit të Tij.