Identiteti shpirtëror i Evropës dhe dialogu ndërmjet krishtërimit e islamit ishin
sot në qendër të bisedimeve ndërmjet Benediktit XVI e presidentit austriak Fisher.
(5.10.2006 RV)Sot – njofton një
notë e Sallës së Shtypit të Vatikanit - Ati i Shenjtë priti në audiencë Presidentin
e Republikës Federale të Austrisë, Shkëlqesinë e Tij, zotin Hainc Fisher. Gjatë bisedimeve,
të zhvilluara në një atmosferë thellësisht të përzemërt e miqësore, u fol kryesisht
për praninë e Kishës katolike në shoqërinë austriake. Të dyja palët shprehën kënaqësinë
për marrëdhëniet e mira ndërmjet Selisë së Shenjtë dhe Austrisë dhe për përkimin
ekzistues mbi temën e identitetit kulturor e shpirtëror të Evropës. U prekën edhe
tema me rëndësi të posaçme në rrethanat e sotme botërore, si promovimi i dialogut
ndërmjet kulturave e feve, veçanërisht ndërmjet krishtërimit e islamit si dhe mospranimi
i asnjë forme të terrorizmit. Presidenti federal austriak i përsëriti Shenjtërisë
së Tij ftesën zyrtare për të vizituar, vitin e ardhshëm, Shenjtëroren mariane të Mariacel,
ftesë që Papa e pranoi me kënaqësi. Pas audiencës me Atin e Shenjtë, presidenti
austriak u takua me kardinalin Tarçizio Bertone, Sekretar i Shtetit të Shenjtërisë
së Tij. Hainc Fisher, 68 vjeç të dielën e ardhshme, socialdemokrat, u zgjodh president
në vitin 2004 e pikërisht dje përfundoi këshillimet me partitë e ndryshme, pas zgjedhjeve
parlamentare të së dielës së kaluar, të fituara nga partia socialdemokrate. Sot
paradite Papa priti në audiencë edhe disa prelatë të Konferencës Ipeshkvnore të Kanadasë
Perëndimore, në vizitë ‘ad Limina’, ndërsa pasdite u takua me kardinalin Ivan Dias,
prefekt i Kongregatës për Ungjillëzimin e Popujve.