Завершыла свае курсы Міжнародная школа рэлігазгнаўцаў, што праходзіла ў вёсцы Літкі
пад Кіевам. Сярод студэнтаў, а таксама выкладчыкаў былі й беларускія тэолагі, філосафы
і іншыя навукоуцы.
Мэта школы - навучыць катэхізатараў кампетэнтна і дэлікатна весці сістэму рэлігійнай
адукацыі. Менавіта пра гэта гаворыць Рэзалюцыя Міжнароднай школы, у якой падкрэслена:"
Рэлігійная адукацыя павінна мець раўнапраўе са свецкай сістэмай, ствараць альтэрнатыўныя
курсы этыкі , якія базуюцца на плюралізмме, талерантнасці, нейтральнасці." Удзельнікі
школы - прадстаўнікі розных народаў, што збіраліся на Украіне, падкрэслілі, што выкладанне
этыкі ў дзяржаўных установах не можа весціся ў форме агітацыі і прапаганды - ці
то атэістычнага, ці то рэлігійнага светаадчування, але павінна несці аб'ектыўную
інфармацыю, веды і маральныя ўстаноўкі. Гэта дапаможа садзейнічаць фармаванню гуманістычных
адносінаў да свету і цярпімасці ў рэлігійных стасунках. Тэма школы - "Канфесійнае
і свецкае вывучэнне рэлігіі - праблема суіснавання" была выбраная ў сувязі з ажыўленай
дыскусіяй, у прыватнасці, у прымаючага Бока - на Украіне - аб ўводзінах рэлігійна-этычных
прадметаў у дзяржаўныя праграмы навучання.