“Turizmi krijon mundësi për shkëmbime kulturore e shpirtërore ndërmjet popujve”: mesazhi
i Papës për Ditën botërore të turizmit.
(26.9.2006 RV)Turizmi është fenomen i praktikuar nga miliona familje, prandaj
ka të bëjë drejtpërdrejtë ose tërthorazi, me të gjitha fushat e jetës njerëzore. Vitet
e fundit flitet shumë për turizmin masiv, në qëndër të vëmendjes së punës baritore
të Kishës, e cila e konsideron edhe si rast për pasurimin njerëzor e shpirtëror.
Pikërisht këtë koncept ripohon e zhvillon Benedikti XVI në mesazhin e dërguar pak
ditë më parë në emër të Tij nga kardinali Angelo Sodano, në sa ishte akoma Sekretar
i Shtetit të Vatikanit, për Ditën e 27-të botërore të turizmit, që do të kremtohet
nesër. “Turizmi pasuron” është tema e Ditës botërore të turizmit 2006, e folja
‘pasuron’ mund të shpjegohet në mënyra të ndryshme, që të gjitha me vlerë. Mund të
themi, pra, se turizmi pasuron jo vetëm financat e vendeve të ndryshme, ku veprimtaritë
turistike ndërkombëtare janë limfë jetike për ekonominë, por ndikon fuqimisht edhe
mbi politikën, mbi kulturën, mbi artin e deri mbi ekologjinë. E, natyrisht, ka një
rëndësi të veçantë edhe për pasurimin e ndjenjave fetare të njerëzve. Këto vlera
ka parasysh Papa në reflektimin e tij, përmes të cilit thekson se në mikpritjen reciproke
ndërmjet të zotit të shtëpisë e mikut, shikon shkëmbimin e pasurive të tokës e të
kulturës, që e bëjnë bashkëjetesën njerëzore më vëllazërore e më solidare. Turizmi
nuk duhet parë thjeshtë në aspektin ekonomik ose material: ai duhet parë si burim
i harmonisë ndërmjet popujve - nënvizon Papa – dhe shton se 40-vjet më parë Koncili
II i Vatikanit pati uruar që koha e lirë, gjithnjë në rritje në krahasim me kohën
e zënë me punë, të shfrytëzohet për të çlodhur shpirtin e për të forcuar shëndetin
e trupit përmes shtegtimeve ndër vende të tjera, në saje të të cilave – nënvizonte
Koncili- shpirti i njeriut përsoset. Në fillim të shekullit të 21-të, për Benediktin
XVI pohimi i etërve konciliarë ka fituar një forcë të re. Shtegtimi - thekson Ati
i Shenjtë -e pasuron shpirtin e njeriut, kur niset për të zbuluar të renë e shtyhet
nga dëshira për të njohur përgjigjet që i kanë dhënë të tjerët pyetjeve të mëdha mbi
jetën njerëzore. Turizmi – vijon Papa – mund të shprehë dëshirën e njeriut për t’i
hapur vetes horizonte të reja, duke u bërë mbartës i qytetërimit dhe i së mirës.
Në se shmangen improvizimi dhe cektësia – përfundon mesazhi papnor – turizmi mund
të bëhet një burim tjetër shumë i frytshëm i pasurimit të vërtetë të njerëzimit. Përmes
tij njerëz e kultura shkëmbejnë vlerat e dijes e të mirëqenies, të drejtësisë e të
lirisë, të bukurisë e të paqes, që i japin kuptim të vërtetë jetës.