Shenjtorët e javës së ardhshme sipas Kalendarit kishtar:
(17.9.2006 RV)Sot Kisha katolike kremtoi të dielën XXIV të kohës gjatë vitit
kishtar. Përkujtoi edhe festën e Shën Robert Belarminit, kardinal, ipeshkëv e doktor
i Kishës. Nesër, e hënë, do të kremtojë Shën Jozef Kopertinin, meshtar
françeskan. Festa e tij na kujton se kush dëshiron t’i lutet Zotit, duhet ta bëjë
këtë me besim e përvujtëri: kështu Zoti do ta pëlqejë lutjen tonë e ne do ta ndjejmë
veten vërtetë të bashkuar me besimtarët e tjerë të cilët i luten, ashtu si ne, Zotit
që na shpërbleu me gjakun e Birit të vet. Të martën do të përkujtohet Shën
Gjenari, ipeshkëv i Beneventit në Itali. Leximet liturgjike të festës së Shenjtit
na kujtojnë se në mëshirën për vejushën e Naimit, që vajton të birin e vetëm të vdekur,
Jezusi na zbulon mëshirën e Atit për secilin prej nesh. Ndërsa me ringjalljen e djaloshit,
paralajmëron ngjalljen e vet. Shenjtorët André Kim Taegon, meshtar dhe Pal Çong
Hasang e shokët e tyre, martirë koreanë, që do të përkujtohen të mërkurën e ardhshme,
na kujtojnë se Zoti di të na duket në mënyra të kuptueshme: por në se nuk kemi përvujtërinë
e nevojshme për t’i lexuar këto shenja, rrezikohemi të mos e kuptojmë e të mos na
kënaqë asgjë. Jehon përsëri në të katër anët e botës fjala e shëlbimit. Jezusi
vijon të thërresë e të dërgojë lajmëtarë kudo. Thirrja i drejtohet të gjithë të krishterëve,
të cilët e kanë për detyrë ta pranojnë fjalën e Zotit e t’ia kumtojnë mbarë njerëzimit.
Këtë na kujton, të enjten e ardhshme, përkujtimi i Shën Mateut, Apostull e
Ungjilltar. Lajmi i mirë që mbush plot zemrën e ne të krishterëve, është se Jezusi
u ngjall prej të vdekurve dhe e mundi mëkatin dhe vdekjen. Pa këtë shpresë, e kotë
do të ishte feja jonë. Na e kujton, të premten, përkujtimi i Shën Mauricit
me shokë, ushtarë e martirë, shën Emeritës dhe Shën Baziles, martire. Të shtunën
do të kremtohet festa e Shën Piut nga Pietrelçina, meshtar kapuçin dhe e Shën
Linit, papë. Na kujtojnë se detyra e besimtarit është të dëgjojë me zemër të hapur
e të gatshme fjalën e Zotit e ta kumtojë atë me gëzim, lirisht e pa kurrfarë interesi