Benedikti XVI nga Regensburgu në festë, kërkon që fytyra njerëzore e Zotit të kundrohet
larg urrejtjes e fanatizmit.
(12.9.2006 RV)“Pa Zotin njeriut nuk i dalin llogaritë!”. Në Meshën e kryesuar
në Regensburg , Benedikti XVI i ftoi besimtarët të kundrojnë fytyrën njerëzore të
Hyjit, duke iu kundërvënë çdo lloj fanatizmi ose spekulimi intelektual. Pasdite
– takimi me profesorët dhe shkencëtarët e universitetit të qytetit dhe lutja ekumenike
me ortodoksët e luteranët. Një shtegtim, që është festë në fe, por që njëkohësisht
i nxit besimtarët t’i bëjnë vetes pyetjen në çka besojnë. I pritur me gëzim dhe emocion
të jashtzakonshëm, sot paradite Benedikti XVI vijoi, në Meshën e kryesuar në sheshin
Islinger Feld, katekizmin që po e shoqëron gjithë shtegtimin e tij apostolik në Bavari.
Nga zemra mariane e Altöttingut, në qytetin e Regensburgut, një nga qëndrat industriale
e teknologjike të Gjermanisë jugore, ku ndërmjet viteve 1969-1971 ka qenë profesor
universiteti, Papa vijoi sot shtegtimin shpirtëror, duke mbajtur një homeli përmes
së cilës kujtoi me forcë epërsinë e Zotit, në një botë që provon të bëjë edhe pa
Të, sepse parapëlqen spekulimet intelektuale ose fanatizmin. “Sot, që i njohim
patologjitë dhe sëmundjet vdekjeprurëse të religjonit e të arsyes, shkatërrimet e
figurës së Zotit për shkak të urrejtejes e të fanatizmit, është me rëndësi të dorës
së parë ta themi qartë cilit Zot i besojmë e ta shpallim me bindje këtë fytyrë njerëzore
të Zotit” – Kështu u shpreh Benedikti XVI gjatë Meshës së kremtuar në Islinger Feld,
që populli tashmë e ka pagëzuar me emrin “Papstwiese” – “Livadhi i Papës”. Të pranishëm
- 300 mijë vetë, shumë prej të cilëve e kishin kaluar natën në livadh. “Zoti
është mirësi – tha Papa – nuk na lë të ecim nëpër terr; na do deri në atë pikë,
sa ta lërë veten ta gozhdojnë mbi kryq, për t’i mbartur vuajtjet e njerëzimit deri
në zemër të vet. Ta shpallësh Krishtin – shtoi Ati i Shenjtë – do të thotë
të çlirohesh nga frika e Zotit, ndjenjë nga e cila, në fund të fundit, lindi ateizmi
modern. Të besosh është e arsyeshme. Që nga iluminizmi – kujtoi Ati i Shenjtë
– të paktën një pjesë e shkencës impenjohet në kërkimin e një shpjegimi të botës,
në të cilin Zoti bëhet i tepërt. *** “Por llogaritë mbi njeriun
pa Zot nuk dalin, e as llogaritë mbi botën, mbi gjithësinë e pafund, pa Zotin, nuk
dalin!”. Në alternativën ndërmjet Arsyes krijuese ose Irracionalitetit që,
jashtë çdo arsyeje, çuditërisht prodhon një kozmos të rregulluar matematikisht, si
rezultat i evolucionit, ne të krishterët besojmë në “Hyjin Atë, Krijuesin e Qiellit
e të Tokës”. “Besojmë – tha Papa – se në zanafillë është Fjala e amshuar, Arsyeja,
jo Irracionaliteti”. Duartrokitje: “Të besosh është e thjeshtë.
Feja është gëzimi i bashkimit të të gjithëve në festë. Kush beson, nuk është kurrë
i vetëm – theksoi Papa – duke përsëritur moton e shtegtimit të tij në Bavari –
dhe shtoi: “Po, kush beson nuk është kurrë vetëm. Vjen e e takon vetë Zoti.
Të ecim edhe ne drejt Zotit e të shkojmë kështu në takimin me njëri-tjetrin. Të mos
e lëmë të vetëm, përsa na lejojnë forcat tona, asnjë nga bijtë e Zotit”. Kështu
u shpreh Ati i Shenjtë dhe në vijim theksoi se fe do të thotë të besosh në Gjyqin
e Mbram, i cili nuk duhet të shkaktojë frikë. Të besosh në gjykimin e Zotit, do të
thotë të besosh në fitoren e së drejtës, në lidhjen e shumë fragmenteve të historisë,
që duken pa kuptim, për t’i bashkuar kështu në një të tërë, në të cilën sundojnë vërtetësia
e dashuria. “Thua nuk dëshirojmë të gjithë që një ditë të dalë në shesh e drejta
për të gjithë ata që janë dënuar padrejtësisht, për ata që kanë vuajtur gjatë e që
pastaj, pas një jete plot dhimbje, janë gëlltitur nga vdekja? Thua nuk dëshirojmë
të marrë fund padrejtësia e vuajtja që shikojmë në histori, që të gjithë të mbushen
me gëzim e gjithçka të marrë kuptim?”.Feja – shtoi Papa, nuk duhet të ngjallë
frikë; ajo është thirrje për ta jetuar jetën me përgjegjësi. Nuk duhet ta shpërdorojmë
jetën tonë, të abuzojmë me të, e as ta mbajmë vetëm për vete; përballë padrejtësisë,
nuk duhet të bëhemi bashkëpunëtorë ose bashkëfajtorë. Duhet ta kuptojmë plotësisht
misionin tonë në histori e të përpiqemi t’i përgjigjemi sa më mirë .