Dje pasdite Gjenova, në Itali, u përshëndet me kryeipeshkvin e vet, kardinalin Tarçizio
Bertone.
(11.9.2006 RV)Që nga data 15 shtator kryeipeshkvi Bertone do të jetë sekretar
i Shtetit të Vatikanit. Në meshën solemne, kremtuar në katedralen e Shën Lorencit,
ishin mbledhur shumë besimtarë, që i shprehën kardinalit mirënjohjen e tyre. Ishte
një shkëmbim prekës ndjenjash ndërmjet tashmë ish-kryeipeshkvit dhe besimtarëve, që
ishin aq të shumtë, sa një pjesë u detyrua ta ndiqte kremtimin përmes ekraneve të
mëdha, vendosur jashtë katedrales, e cila me këtë rast ishte stolisur me lulet mitike
të San Remos: trimijë karafilë të bardhë, ngjyrë portokalli, të kuq e ngjyrë trëndafili.
Ishte një skenë e denjë për ngjarjen, në të cilën kryeipeshkvi Bertone kujtoi rolin
e rëndësishëm që luan Gjenova në Kishën italiane e në historinë e ardhme të vendit.
I ftoi, pastaj, besimtarët të jenë dëshmitarë të gëzimit e të fesë edhe në mjediset
e jetës së përditshme. Duke kujtuar ngjarje të spikatura të dioqezës, sidomos misionet
e saj në botë, kardinali nuk e fshehu emocionin e, gati i përlotur, tha: “Më kujtoni
mua, Tarçizin!”, duke dëshmuar kështu se e deshi fort vendin, nga i cili po largohet.
Për t’u kujtuar – procesioni që i parapriu Meshës, në krye të të cilit ishin një numër
i madh fëmijësh me flamujtë e vendeve të botës dhe portreti i Zojës së Bekuar, Mbretëreshës
së Qytetit, dhuratë e besimtarëve, që kardinali Bertone ka premtuar se do ta vendosë
në zyrën e tij të re të Sekretarit të Shtetit të Vatikanit. E tani Gjenova pret, me
të njëjtën dashuri, kryeipeshkvin e ri, imzot Banjaskon.