(8.9.2006 RV)Nesër do të fillojë shtegtimi apostolik i Papës Benedikti XVI
në Gjermani me temë “Kush beson nuk është kurrë vetëm. Ati i Shenjtë do të niset
nga Kastel Gandolfo e do të rikthehet ndër viset ku pati jetuar para se të zgjidhej
papë. Do të vizitojë Marktl am Inn, ku ka lindur 79 vjet më parë; pastaj Altoeting-Regensburgun,
ku ka dhënë mësim si professor universiteti, Munihun, ku ka kryer misionin ipeshkvnor,
duke rikujtuar edhe historinë e kryedioqezës së Munihut e Frisingës, ndoshta më e
vjetra në Gjermani. Për t’u njohur nga afër me atmosferën e pritjes së Atit të Shenjtë,
Atë Eberhard Gemingen i programit gjerman të Radio Vatikanit intervistoi kardinalin
Fridrih Veter, kryeipeshkëv i kryedioqezës Munih-Frizingës, i cili dje mbajti
një konferencë shtypi mbi vizitën e Papës, që nis nesër:
Pyetje: - Ç’pritet
nga vizita e Papës?
Përgjigje: - Kjo vizitë pritet si festë e fesë.
Dëshirojmë që njerëzit ta ndjejnë ç’është Kisha: është bashkim me Papën, por pas këtij
bashkimi me Papën është bashkimi me Krishtin. Në Riem, kur do të kremtojmë Meshën
e madhe, duam të lartojmë Kryqin e Engausen, që është restauruar kohët e fundit. Pikërisht
me rastin e restaurimit u zbulua se ky Kryq, që e paraqet të Kryqëzuarin në madhësi
natyrore, është më i madhi në botë. I realizuar në vitet 890-900 Kryqi është dëshmi
e fesë në vendin tonë, asaj feje që e formoi vendin tonë për më se njëmijë vjet,
e ne duam që të gjithë ta kuptojnë këtë fakt. Mendoj se kjo vizitë e Atit të Shenjtë
duhet të japë provën e forcës së fesë sonë e urojmë edhe që t’i përforcojë në fe të
gjithë ata që do të vijnë për të bashkëkremtuar Meshën me ne.
Pyetje: -
Vizita e Papës është shtytje për të përballuar vështirësitë e Kishës gjermane….
Përgjigje:
- Në se shikoj ligështitë e Kishës, sytë e mi ndalen në konceptin e shekullarizimit
të Kishës. Nuk duhet të borgjezohemi, sepse kështu bëhemi të ligësht e nuk jemi në
gjendje ta bëjmë të dukshme fenë tonë të krishterë. Ja, kjo më duket detyra më e madhe:
nga njëra anë, të jemi të lidhur me botën, nga ana tjetër, të jemi flamur i shpalosur,
që të gjithë ta shohin qartë se jemi të krishterë.
Pyetje: – E ç’duhet bërë
për ta realizuar këtë?
Përgjigje: - Në radhë të parë, një kumtim
të fesë që synon thelbësoren. Ati i Shenjtë e bën këtë në mënyrë shumë të bukur e
të frytshme: theksoj kumtimin e fesë, sepse Kisha rinohet gjithnjë pikërisht nëpërmjet
këtij kumtimi. Në radhë të dytë, kremtimi i Meshës, sepse ky nuk është vetëm çast
takimi, por lartim shpirtëror, që duhet të bëhet takim me Krishtin e pranishëm. Në
se e kam kuptuar si duhet historinë e Kishës, risimi i Kishës është vërtetuar gjithnjë
së bashku me risimin e Meshës. E risimi i Meshës ka të bëjë jo vetëm me modifikime
strukturore, por me një kremtim plot gjallëri, që kthehet në takim me Krishtin e ngjallur.
Kur hebreu hynte në tempull, e ndjente veten përballë fytyrës së Zotit: duhet të mësojmë
përsëri se ndodhemi para fytyrës së Hyut.
Pyetje: - Gjatë vizitës së Papës
do të jenë të pranishëm shumë të ftuar edhe nga jashtë. A mund të na flisni pak për
ta ?
Përgjigje: - Sigurisht, kam ftuar të gjithë ipeshkvijtë gjermanë
e austriakë, duke u krijuar atyre tri mundësi: mund të vijnë në Munih, në Altoting
ose në Regensburg. Por kemi ftuar edhe ipeshkvij të tjerë nga jashtë. Disa prej tyre
kanë lidhje të posaçme me Munihun, në se nisem nga ky qytet: kemi lidhje me dioqezën
e Pajtorit të dioqezës sonë, Shën Korbinianon, që ndodhet në jug të Parisit; do të
vijë ipeshkvi i saj. Kam ftuar edhe kardinalin Lystizher e, nga Polonia, përmes lidhjeve
të mia personale, kardinajtë Makarski e Dzhivish, të cilët e kanë pranuar ftesën;
pastaj, që prej 40 vjetësh kemi marrëdhënie me Ekuadorin, prej nga do të vijë kryetari
i Konferencës Ipeshkvnore. Shpresoj se të gjithë të ftuarit do të ndjehen si në shtëpi
të vet e do ta shtojnë gëzimin tonë për vizitën e Papës.