Пілігрымка да Слугі Божага Зыгмунта Лазінскага Раніцай 26 жніўня 2006 г. з Мінска
ў Пінск накіравалася аўтобусная пілігрымка. Мэтаю пілігрымаў была малітва каля труны
Слугі Божага біскупа Зыгмунта Лазінскага, а таксама наведанне дыяцэзіяльнага санктуарыя
пінскага Касцёла ў Лагішыне. У мурах старажытнай пінскай катэдры Унебаўзяцця Найсвяцейшай
Панны Марыі 46 удзельнікаў пілігрымкі вітаў Апостальскі Адміністратар Пінскай дыяцэзіі
кардынал Казімір Свёнтэк. Адразу пасля прыбыцця ў Пінск пілігрымы наведалі Міждыяцэзіяльную
вышэйшую духоўную семінарыю імя святога Тамаша Аквінскага, а семінарыя, як вядома,
з’яўляецца сэрцам кожнай дыяцэзіі. Прэфект семінарыі ксёндз Аляксей Раманчук паказаў
мінскім гасцям гістарычны будынак, у якім калісьці вучыўся малады семінарыст Казімір
Свёнтэк, і дзе цяпер рыхтуюцца да святарскага служэння юнакі з трох дыяцэзій Беларусі:
Пінскай і Віцебскай, а таксама з Мінска-Магілёўскай архідыяцэзіі. Пасля наведання
семінарыі пілігрымы ўдзельнічалі ў святой Імшы, якую цэлебраваў у пінскай катэдры
«патрыярх» Касцёла ў Беларусі кардынал Казімір Свёнтэк. Пасля Імшы кардынал распавёў
удзельнікам пілігрымкі пра гісторыю пінскай катэдры, якая цесна пераплялася з яго
лёсам, а потым правёў іх у крыпту, дзе спачывае цела Слугі Божага біскупа Зыгмунта
Лазінскага. Менавіта тут, дакрануўшыся да труны першага Пінскага біскупа, Казімір
Свёнтэк, яшчэ будучы юнаком, упершыню адчуў у сваім сэрцы пакліканне да святарства…
Пакінуўшы гасцінны Пінск, пілігрымка скіравалася ў Лагішын. Мінскіх вернікаў прывітаў
кусташ пінскага дыяцэзіяльнага санктуарыя а. Міраслаў Жлабінскі, арыяніст. Перад адкрытым
цудатворным абразом Маці Божай Лагішынскай пілігрымы ўзнеслі свае шчырыя малітвы,
пасля чаго, духоўна ўзбагачаныя, рушылі ў зваротны шлях.