Адзін в самых уплывовых каталіцкіх ерархаў Польшчы, арцыбіскуп Люблінскі Язэп Жычынскі,
выступаючы перад пілігрымамі, якія сабраліся каля галоўнай святыні палякаў – кляштара
на Яснай гарэ ў Чанстахова, рэзка асудзіў ініцыятыву адной з партый правячай кааліцыі
аб аднаўленні смяротнага пакарання ў краіне. Сцвярджаецца, што такі падыход нібыта
адпавядае навуцы Каталіцкай Царквы. У гэтым кантэксце арцыбіскуп Жычынскі нагадаў
аб існаванні энцыклікі “Evangelium Vitae” Яна Паўла II, у якой гаворыцца аб святасці
і недатыкальнасці чалавечага жыцця, і падкрэсліваецца, што пакаранне нават самых небяспечных
злачынцаў не павінна прадугледжваць пазбаўлення іх жыцця. Не так даўно адна з
партый правячай кааліцыі “Ліга польскіх семьяў”, якая лічыць што кіруецца навукай
Каталіцкай Царквы, выступіла з прапановай зноў увесці ў Польшчы смяротнае пакаранне
для забойцаў і педафілаў. Як заяўляюць прадстаўнікі згаданай партыі, яны ўжо сабралі
500.000 подпісаў грамадзянаў краіны, якія неабходны для правядзення агульнанацыянальнага
рэферэндума па дадзенай праблеме.