16 жніўня завершыў сваю місію ў Ліване кардынал Рожэ Этчегарай, спецыяльны пасланец
Апостальскай сталіцы ў гэтай краіне. “Цяпер, калі гарматы маўчаць, Ліван можа адчуць,
што яго сэрца б’ецца дзеля еднасці Бацькаўшчыны і дзеля міра паміж народамі”. Кардынал
Этчегарай запэўніў, што “Папа надае вялікую ўвагу пакутам і матэрыяльным і духоўным
патрэбам усіх ліванцаў”. Ён заклікаў працягваць аказанне дапамогі Лівану, сотні тысяч
грамадзян якога засталіся без даха над галавой. Кардынал, які пабываў у лагеры для
ўцекачоў, падкрэсліў, што “ліванскія хрысціяне і мусульмане гатовы зрабіць усё, каб
разам аднавіць іх параненую краіну”. Маранітскі біскуп Біблоса Бешара Раі паведаміў
нашаму карэспандэнту аб літургіі, адцэлебраванай кардыналам Этчегараем у свята Унебаўзяцця
Панны Марыі. Ён дадаў, што ліванцы ўспрынялі прысутнасць пасланца Папы, яго словы
і яго салідарнасць з імі з вялікай радасцю і падзякай у адносінах да Свяцейшага Айца.
Біскуп таксама сказаў, што ўцекачы вяртаюцца ў свае родныя мясціны, хаця многія не
знойдуць там уласных дамоў, разбураных пад час узброенага канфлікта. Размова ідзе
перад усім аб мусульманах, якія жывуць на поўдні краіны. “Аднак, - зазначыў біскуп,
- яны жадаюць жыць на гэтай зямле – яны сведчаць аб тым, што Ліван не жадае паміраць,
што ліванцы, мусульмане і хрысціяне, могуць жыць разам у міры і згодзе”. Многія ўцекачы
выказваюць падзяку Царкве, гуманітарным арганізацыям і асабіста Бенедыкту XVI° за
дапамогу і падтрымку. Па словах маранітскага біскупа, ліванцы зноў паказалі свету,
что жыццё чалавека мае непараўнальна большую вартасць, чым зброя.