Нядзельная Багародзічная малітва "Анёл Панскі" з удзелам Бенедыкта XVI°.
Свяцейшы Айцец Бенедыкт XVI°, які цяпер знаходзіцца ў сваёй загараднай рэзідэнцыі
ў Кастэльгандольфо, адгаварыў у мінулую нядзелю 13 жніўня разам з вернікамі і турыстамі
з розных краінаў Багародзічную малітву “Анёл Панскі”. У сваім казанні, непасрэдна
перад малітвай, Папа звярнуў увагу на ўзброены канфлікт паміж Iзраілем і Ліванам,
які, на думку Свяцейшага Айца, можа быць спынены. Бенедыкт XVI° зноў заклікаў усіх
людзей добрай волі і, перад усім, хрысціянаў ужыць таксама перыяд летніх адпускоў
для узмацнення духа, а не толькі фізічнага стану. У прыватнасці, у тым, што тычыцца
вайны на Блізкім Усходзе, Бенедыкт XVI° зазначыў: “Апошнія падзеі даюць надзею, што
сутычкі (паміж варожымі бакамі) будуць спынены і што ў хуткі час і дзейсным чынам
будзе забяспечана гуманітарная дапамога пакутуючым народам. Спадзяюся, - зазначыў
Папа, - што ўрэшце мір пераможа насілле і ўзброеную сілу”. Малітва Свяцейшага
Айца за мір у Ліване была накіравана да Багародзіцы, Унебаўзяцце Якой адзначаецца
па рыма-каталіцкаму літургічнаму календару 15 жніўня, калі вялікая колькасць людзей
у Заходняй Еўропе выязджае на адпачынак. У сувязі з гэтым Папа сказаў: “Адпачынак
дае нам каштоўную магчымасць правесці болей часу са сваімі сямейнікамі, наведаць родных
і сяброў. Карацей кажучы, дае магчымасць для чалавечых кантактаў, якія цяжка здейсніць
пад час звычайных штодзённых абавязкаў”. Не забыўся Бенедыкт XVI° і аб тых, што
па розных нагодах не маюць магчымасці адпачыць. Звяртаючыся да гэтых людзей ён зазначыў:
“Асаблівым чынам накіроўваю мае думкі да самотных, да састарэлых і хворых, якія часта
ў гэты перыяд яшчэ больш адечуваюць сябе самотнымі. Гэтым нашым братам і сёстрам хачу
паказаць сваю духоўную лучнасць, шчыра жадаючы, каб нікаму з іх не было б недахопу
ў падтрымцы і дапамозе блізкіх”. – сказаў Папа напрыканцы свайго казання пад час Багародзічнай
малітвы ў мінулую нядзелю.