“Lufta nuk zgjidh asgjë, ajo është zgjidhja më e keqe për të gjithë, edhe për fitimtarët.”
Kështu tha Papa Racinger dje në Castel Gandolfo, në një intervistë dhënë Radio Vatikanit
(6.8.06.RV)dhe disa televizioneve gjermane, në kuadrin e vizitës së tij apostolike
që do ta bëj në Bavari në gjysmën e shtatorit. Intervista i kushtohet temave të ndryshme
e do të transmetohet me 13 gushtin e ardhshëm. Benedikti XVI edhe një herë i bën
thirrje botës, së cilës i përsërit me forcë se lufta është zgjidhja më e keqe për
të gjithë. “Selia e Shenjtë, thotë Papa — nuk do asnjë fuqi politike, por duam t’u
bëjmë thirrje të krishterëve dhe të gjithë atyre që në ndonjë mënyrë e ndjejnë veten
të thirrur nga fjala e Selisë së Shenjtë që të mobilizohen me të gjitha ato forca
që e pranojnë se lufta është zgjidhja më e keqe për të gjithë. Nuk sjell asgjë të
mirë as për fitimtarët.” Papa kujton se si Evropa i njeh mirë tmerret e luftës, si
pasojë e dy konflikteve botërore, dhe ripohon me forcë se “ajo për çka kanë nevojë
të gjithë është paqja.” “Ka forca morale – përfundon Ati i Shenjtë – që janë të gatshme
të japin të kuptojnë se zgjidhja e vetme është të jetojmë së bashku.” Këto forca duam
të mobilizojmë. Politikanët duhet të gjejnë rrugët në mënyrë që kjo të ndodhë sa
më shpejt të jetë e mundur dhe mbi të gjitha në mënyrë të qëndrueshme.