Зварот рэлігійных кіраўнікоў Лівана аб спыненні вайны.
Кіраўнікі 17 рэлігійных суполак надрукавалі супольную заяву, у якой заклікалі варожыя
бакі да неадкладнага спынення канфлікта і выказалі сваю падтрымку ўраду Фуада Сініоры.
Кіраўнікі згаданых суполак сабраліся 1 жніўня на надзвычайнае спатканне ў Бкерке,
зімняй рэзідэнцыі маранітскага патрыярха Насраллы Сфейра. Удзельнікі сустрэчы абмеркоўвалі
толькі адно пытанне – “Вывучэнне трагічнага развіцця сітуацыі ў Ліване і гуманітарнага
крызіса, выкліканага ўцёкамі 700 000 чалавек з поўдня краіны і Бейрута”. На спатканні,
якое працягвалася больш за дзве гадзіны, прысутнічаў кардынал Сфейр; галоўны муфтій
мусульманаў-суннітаў Лівана шейх Муххамад Рачыд Каббааніад; намеснік старшыні Рады
мусульманаў-шіітаў шейх Абдель Амір Кабалан і іншыя рэлігійныя дзеячы краіны. Пасля
заканчэння сустрэчы яны абнародвалі сваю супольную заяву, у якой заклікалі абодвы
варожыя бакі да неадкладнага спынення ўзброенага канфлікта. Асаблівая ўвага ў
дакументе надаецца захаванню Iзраілям так званай “Блакітнай лініі ААН”, якая падзяляе
Ліван і Iзраіль, а таксама вываду ізраільскіх вайскоўцаў з Шааба і Кфарчуба. Удзельнікі
сустрэчы заклікалі асобаў, адказных за “безсэнсоўную і неапраўданую вайну”, правесці
абмен палоннымі жаўнерамі і стварыць гуманітарныя карыдоры, дзякуючы чаму людзі здолеюць
атрымліваць неабходную дапамогу. Рэлігійныя кіраўнікі Лівана заклікалі ААН да неадкладных
дзеянняў па змене сітуацыі, у якой краіна знаходзіцца ўжо 19 дзён. Напрыканцы
дакумента рэзка асуджаюцца бамбардыроўкі вёскі Кана, у выніку чаго было забіта 60
мірных жыхароў. Рэлігійныя кіраўнікі Лівана ўзнеслі малітвы Усемагутнаму Богу аб спыненні
вайны і насілля.