Papa i nxit besimtarët të vijojnë lutjen për paqe në Lindjen e Mesme.
(3.8.2006 RV)Dje,
në audiencën e përgjithshme, Benedikti XVI u bëri përsëri thirrje besimtarëve të mos
lodhen s’i kërkuari Zotit dhuratën kryesore të harmonisë ndërmjet njerëzve në mbarë
botën. “Lutjet nuk janë të kota – pohon Papa – prandaj duhet të lutemi me gjithë
shpirt, sepse lutja është arma jonë kryesore: është britmë që i drejtohet jo vetëm
Zotit, por edhe njerëzve. Prandaj – shton Papa – të mos heshtim e të bëjmë të pamundurën
që lutja jonë të arrijë në veshët e njerëzve të pushtetshëm, që të heshtin armët e
të ndalohet menjëherë zjarri. Benedikti XVI e ngriti zërin që në fillim të konfliktit
e kryesisht në lutjen e Engjëllit të Tënzot më 16 korrik në Lë Kombë, ku e shpjegoi
kështu situatën e krijuar: “Në origjinë, për fat të keq, janë situatat objektive
të shkeljes të së drejtës dhe të drejtësisë. Por as aktet terroriste e as raprezaljet,
nuk mund të përligjen, kur kanë pasoja tragjike për popullsitë civile. Siç na dëshmon
përvoja e hidhur, me rrugë të tilla nuk mund të arrihen kurrë rezultate pozitive” Papa
shpreson që udhëheqësit politikë të kthehen në rrugën e arsyes, duke krijuar mundësi
të reja dialogu e mirëkuptimi. Të dielën, më 23 korrik, gjithnjë gjatë lutjes së Engjëllit
të Tënzot në Vale D’Aosta, Papa e shpjegoi kështu qëndrimin e Selisë së Shenjtë: “Shfrytëzoj
rastin për të ripohuar të drejtën e libanezëve për integritetin dhe sovranitetin e
vendit të tyre, të drejtën e izraelitëve për të jetuar në paqe në shtetin e tyre
dhe të drejtën e palestinezëve për të pasur një atdhe të lirë e sovran”. Më
pas Benedikti XVI kujtoi viktimat e ndeshjeve të pamëshirshme, të cilat i dënoi përsëri: “Jam
posaçërisht pranë popullsive të pambrojtura civile, të përfshira padrejtësisht në
një konflikt në të cilin janë thjeshtë viktima: pranë popullsive të Galilesë, që detyrohen
të jetojnë ndër strehime, ashtu si pranë shumicës së libanezëve, që shohin si shkatërrohet
përsëri vendi i tyre e që detyrohen të braktisin gjithçka, për të kërkuar shpëtim
gjetiu”. Benedikti XVI përsërit thirrjen drejtuar të gjitha organizatave bamirëse
që të japin ndihmesën e tyre, në mënyrë që popullsitë e tronditura nga lufta ta shikojnë
konkretisht shprehjen e solidaritetit të përbashkët. Të dielën, më 30 korrik, nga
Kastel Gandolfo vërejti me hidhërim se në zemrat e shumë njerëzve po shtohet urrejtja
e dëshira për hakmarrje. Këto fakte tregojnë qartë se me dhunë nuk mund të zbatohet
drejtësia, të krijohet një rend i ri e të ndërtohet paqja e vërtetë. E, prej këndej
Papa ia besoi pajtimin ndërmjetësimit të Marisë, Nënë e Princit të Paqes e Mbretëreshë
e Paqes, që nderohet aq shumë në një pjesë të mirë të vendeve të Lindjes së Mesme
ku – ripohoi Shenjtëria e Tij – shpresojmë të mbretërojë së shpejti ai pajtim, për
të cilin Zoti Jezus flijoi Gjakun e tij të çmuar. Së fundi dje, në Sheshin e
Shën Pjetrit, i ftoi rishtas besimtarët të vijojnë me kambëngulje lutjen, duke mos
e fshehur tronditjen e thellë: “Sytë tanë janë plot me pamjet rrënqethëse të
trupave të coptuar të shumë njerëzve, posaçërisht të fëmijëve – e mua më shkon mendja
sidomos në Kanë, në Liban. Dëshiroj të përsëris se asgjë nuk mund ta përligjë derdhjen
e gjakut të pafajshëm, kushdo qoftë ai që e derdh. Me zemrën e këputur nga dhimbja,
përsëris thirrjen për t’i dhënë menjëherë fund konfliktit e dhunës, ndërsa nxis bashkësinë
ndërkombëtare si dhe të gjithë ata që lidhen drejtpëdrejtë me këtë tragjedi, të përcaktojnë
sa më shpejt kushtet e nevojshme për zgjidhjen politike të krizës, në mënyrë që t’u
dorëzohet një ardhmëri më e qetë e më e sigurtë breznive të reja”.