Në Liban vazhdon sulmi i këmbësorisë dhe i aviacionit izraelit: në mikrofonin e Radio
Vatikanit, Atë Pjerbatista Picabala, Rojtar i Tokës Shenjte
(1.8.2006 RV) Në komunikatën më të fundit që vjen nga fronti libanez ushtria
izraelite bëri të ditur se gjatë ditës së sotme u vranë apo u plagosën në luftime
rreth 20 luftëtarë hezbollahë. Nga ana tjetër, hezbollahët e përgënjeshtruan lajmin
duke lajmëruar se të vrarët ishin vetëm tre. Ndërkohë diplomacia ndërkombëtare po
përpiqet pa sukses të gjejë një rrugëdalje.
“Ofensiva e këmbësorisë izraelite
synon përgatitjen e terrenit për zbarkimin e një force shumëkombëshe në kufirin izraelo-libanez.”
Sipas kryeministrit Ehud Olmert ky është objektivi i sulmeve të fundit. Synohet pra
që hezbollahët të shtyhen përtej lumit Litani, 30 km nga kufiri izraelit. Shpresat
për paqen duken ende të largta, ndërsa në Iran Ajatollah Janati u bëri thirrje vendeve
arabe që të furnizojnë me armë e municion hezbollahët. Gjithashtu sulmet ajrore izraelite
që duhet të ishin pezulluar për 48 orë, vazhduan edhe sot. Po ashtu sulmet e aviacionit
vijojnë edhe në Rripin e Gazës. Por më hollësisht mbi situatën në Tokën Shenjte
në mikrofonin e Radio Vatikanit flet Atë Pjerbatista Picabala, rojtar i Tokës Shenjte:
Përgjigje:
Para së gjithash duhet thënë se Vendet e Shenjta janë të gjitha të paprekura dhe se
nuk ka dëme. Porse atmosfera është shumë e trishtueshme sepse janë pothuajse bosh.
Gjithçka është ndalur. Vendet janë të hapura por janë bosh. Nuk ka shtegtarë, nuk
ka turistë, nuk ka njerëz. Vendi është ndalur dhe bllokuar.
Pyetje: Atë
Picabala na ndihmoni të kuptojmë diçka. Ju ç’ide keni krijuar mbi këtë krizë ndërmjet
Izraelit, hezbollahëve dhe Libanit?
Përgjigje: Një ide të turbullt,
si të gjithë sigurisht. Është shumë e vështirë të nxjerrësh përfundime, sepse kur
e sheh këtë situatë nga këndvështrime të ndryshme gjithnjë dikush ka të drejtë e tjetri
gabon. Para së gjithash duhet thënë se Izraeli reagoi me një forcë dhe një fuqi të
papritur, që sigurisht ngren shumë pyetje. Masakra e së dielës është një shembull
i kësaj. Është e dukshme pastaj se me armë nuk arrihet në një përfundim.