(17.7.2006 R.V.)Takimi i Grupit të 8-shes që u mbyll sot në Shën Pjetërburg
miratoi një dokument përfundimtar prej gjashtë faqesh. Të shumëllojshme temat kryesore,
që shkojnë nga energjia te situata në Nagorni-Karabah e në Lindje të Mesme, nga arsimi
tek ekonomia e globalizimi. Në këtë dokument nënvizohet rëndësia e “një arsimimi modern
për t’u bërë ballë sfidave të globalizimit” si edhe nismat që duhen ndërmarrë “për
të luftuar përhapjen e epidemive”. Këtë herë në punimet e Grupit të 8-es morën pjesë
edhe vendet në zhvillim të hovshëm si Kina, Brazili, Meksika, India, dhe Afrika e
Jugut. Edhe pse u vlerësua si i suksesshëm takimi nxori në pah qëndrimet e ndryshme
përsa i përket situatës në Lindje të Mesme. Kështu sekretari i përgjithshëm i OKB-së
Kofi Anan i kërkoi izraelitëve dhe hezbollahëve armëpushim të menjëhershëm, ndërsa
presidenti amerikan Xhorxh Bush pasi theksoi të drejtën e Tel-Avivit për t’u mbrojtur,
shtoi se hezbollahët, të ndihmuar nga Siria dhe Irani, po përpiqen të pengojnë procesin
e paqes.
Megjithë angazhimin e forcave ndërkombëtare, në Irak vijon gjakderdhja.
Atentati i sotëm në tregun e Mahmudijes, në jug të Bagdadit, shkaktoi 55 të vdekur
dhe me dhjetra të plagosur. Gjithashtu dje pati 28 të vrarë nga një sulm terrorist
me kamikaze në qytetin e Tuz Kurmatit në veri të vendit.