“Familja duhet ndihmuar”: është e nevojshme për të mirën e mbarë njerëzimit. Kjo është
thirrja e Benediktit XVI nga Valencia e Spanjës, ku dje kremtoi Meshën përfundimtare
të Takimit V Botëror të Familjeve.
(10.7.2006 RV)Nga Valencia Papa
Benedikti XVI i ftoi familjet në takimin e tyre të ardhshëm botëror në Qytetin e
Meksikos, duke u transmetuar një mesazh shprese, paqeje e gëzimi, e duke i nxitur
të gjithë që ta kuptojnë rolin e pazëvendësueshëm të lidhjes martesore, për të mirën
e mbarë njerëzimit. Familja – tha Papa - është pasuri për popujt e themel për
shoqërinë, asgjë nuk mund ta zëvendësojë plotësisht. Fjalë të qarta, të thjeshta,
të prera këto të Benediktit XVI drejtuar të gjithëve, duke përfshirë edhe qeveritarët
e ligjvënësit, që të kuptojnë se lidhja martesore, përmes së cilës burri e gruaja
japin besën të qëndrojnë gjithë jetën përkrah njëri –tjetrit, është një e mirë e madhe
për mbarë njerëzimin. Miliona e miliona njerëz në të katër anët e botës e dëgjuan
zërin e Atit të Shenjtë, që u ngrit nga Valencia për t’u dhënë zemër bashkëshortëve,
prindërve, bijve, gjyshërve, duke i ftuar të luten për ardhmërinë e familjeve, për
forcimin e dashurisë e të besnikërisë në të gjitha martesat, posaçërisht në rastet
kur bashkëshortët kalojnë çaste të vështira. E ardhmëria e familjes kërkon
vetëdije dhe impenjim nga ana e të gjithëve. Për këtë na flet drejtori i përgjithshëm
i Radio Vatikanit, atë Federiko Lombardi, që e shoqëroi Atin e Shenjtë në tokën
spanjolle: Akitekturat moderniste, madje mund të themi, futuriste – të Qytetit
të arteve e të shkencave, ishin sfondi i hapësirës së madhe, të përmbytur nga dielli,
ku u kremtua ky takim i madh feje e urate rreth Papës. Familje katolike që transmetojnë
fenë e tyre: familje normale, të të gjitha moshave e të të gjithë vendeve të botës,
familje njerëzish që duhen mirë, që besojnë se Zoti u ka falë një dhuratë të madhe,
atë të dashurisë besnike, të aftë për t’u dhuruar e për të dhuruar jetë, të aftë për
mikpritje e solidaritet. Impenjohen, prandaj, ta mbrojnë dhe e lusin Zotin t’ua ruajë. Këto
familje, për fat të mirë, janë të shumta e këtë ta thotë edhe vetë takimi i Valencies.
Të thotë se dashuria e krishterë është e mundur. Edhe ata që nuk e kanë provuar këtë
dhuratë ose që kanë provuar shijën e hidhur të dështimit të saj, janë të shumtë e
shpesh vuajnë thellësisht. Shumë prej tyre mendojnë edhe se afirmimi i përparësisë
së lirisë individuale përkon me situatën e shoqërisë të sotme e të nesërme, shumë
më tepër se këmbëngulja për ta ruajtur vlerën e besnikërisë e të qëndrueshmërisë së
familjes, që sot shkon kundër rrymës. Kur për këtë takim u zgjodh Valencia, nuk mund
as të përfytyrohej se Spanja do të bëhej një nga vendet që do ta shprehnin në mënyrën
më dramatike situatën e alternativës përballë së ardhmes; e kjo, për shkak të pranisë
të traditës së saj të lashtë katolike e ligjshmërisë, që orientohej nga një drejtim
thellësisht i ndryshëm. Fjalët e Papës qenë të qarta e të matura. Ta thuash haptazi
atë në të cilën beson, është detyrë për çdo njeri, për Papën është mision. Nuk ka
asnjë njet polemik: bëhet fjalë për ta bërë të qartë atë që po vihet në lojë. E në
lojë është një nga vendet themelore, madje vendi i zanafillës të përvojës së dashurisë
e prej këndej edhe i cilësisë dhe i mirësisë së marrëdhënieve njerëzore. E kjo është
një e mirë tepër e madhe për të gjithë, prandaj nuk mund të shpërfillet e as të errësohet.
Është pasuri që duhet mbrojtur për sot e për nesër, sepse për fat të keq, shoqëria
mundet edhe ta humbasë ose ta shikojë si bëhet gjithnjë më e rrallë, sa të konsiderohet
diçka e jashtëzakonshme, në vend që të jetë pikëmbështetje e zakonshme. Kisha,
familjet katolike, të gjithë njerëzit vullnetmirë të çdo konfesioni e feje duhet ta
luajnë rolin e tyre. Përtej shpalljeve të parimeve, është puna baritore e përditshme
dhe dëshmia e përditshme e jetës. E është pikërisht kjo dëshmi që, pavarësisht nga
vështirësitë e mëdha, krijon kushte për transmetimin e vlerave pozitive nga një brez
tek tjetri, nga një njeri tek tjetri. Urojmë që Valencia të jetë mesazh shprese
për të gjithë ata që, përvuajtërisht e konkretisht, në të katër anët e botës, impenjohen
që dashuria t’i gjejë udhët për t’u mbajtur në këmbë e për t’u manifestuar! Shenjë
kjo, që tregon se njeriu është shëmbëllim i Zotit!
Pas Valencies, vështrimi
drejtohet nga Qyteti i Meksikos, ku do të mbahet më 2009 Takimi VI Botëror
i Familjeve. Njoftimin e dha dje Benedikti XVI në praninë e Kryeipeshkvit të kryeqytetit
meksikan, kardinalit Norberto Ribera, që u ngjit në elter dhe e falënderoi personalisht
Atin e Shenjtë për këtë zgjedhje. E në Amerikën Latine filloi menjëherë interesimi
për tubimin e ardhshëm të familjeve. Kardinali Ribera deklaroi se mbarë
populli meksikan, katolikët e ipeshkvijtë e tyre janë shumë të emocionuar për këtë
vendim të Papës, dhe shtoi: “Mënyra më e mirë për ta falënderuar Atin e Shenjtë është
të fillohet menjëherë katekizmi parapërgatitor për një ngjarje kaq të rëndësishme
kishtare, shoqërore, shpirtërore, morale e baritore. Kështu Qyteti i Meksikos do të
jetë për Amerikën Latine, çka ishte këto ditë Valencia për Evropën, sepse takime të
tilla, që vënë në qendër të vëmendjes universalitetin e problematikës së madhe familjare,
krijojnë kushtet për t’i thelluar më tej përmasat zonale të çështjeve të familjes.
E kjo, sepse në zona të ndryshme të planetit, kriza e familjes, me të gjitha pasojat
që e karakterizojnë shpërbërjen e saj në mbarë botën – ka karakteristika të veçanta.
Përballë kësaj situate vijon të gjallërohet gjithnjë më shumë veprimtaria e kishave
vendase në favor të institucionit familjar, që i ka rrënjët në planin e Zotit e që
përfaqëson modelin e pazëvendësueshëm për të mirën e përbashkët të njerëzimit.