Свяцейшы Айцец Бенедыкт XVI° вярнуўся з Гішпаніі. Прапануем вашай увазе змест яго
нядзельнага казання.
Шаноўныя слухачы, як вы напэўна ведаеце, у нядзелю 9 ліпеня скончылася кароткае падарожжа
Свяцейшага Айца Бенедыкта XVI° у Гішпанію. Папа вярнуўся ў Ватыкан праз рымскі аэрапорт
“Чампіно” учора, у другой палове дня. Зараз мы прапануем вашай увазе змест галоўнага
казання Папы, прамоўленага пад час нядзельнай Святой імшы, адпраўленай у мінулую нядзелю
ў Валенсіі. “Дарагія браты і сёстры, На гэтай Святой імшы, якую я з вялікай радасацю
цэлебрую, у саслужэнні са шматлікімі братамі-біскупамі і святарамі, хачу падзякаваць
Пана за ўсе любыя майму сэрцу семьі, што сабраліся тут, а таксама за ўсіх іншых, хто
прыймае ўдзел у гэтай Богаслужбе здалёка, па радыю і тэлебачанню. Вітаю ўсіх вас і
з вялікаў любоўю абдымаю вас з пажаданнем міру. Сведчанне Эсфіры і Паўла, - працягнуў
Папа, - якое мы зараз пачулі пад час літургічнага чытання, указвае на тое, што сямья
заклікана удзельнічаць у сведчанні веры. Эсфір кажа: “Я чула, Пане, ад бацькі майго,
… што ты, Пане, абраў Сабе Iзраіль з усіх іншых народаў”. Павел наследуе традыцыю
продкаў-юдэяў, ідучы за Богам з чыстым сумленнем. Ён усхваляе шчырую веру Цімафея,
нагадваючы яму аб “веры…., якая перад тым жыла ў бабцы тваёй Лоідзе і маці тваёй Эўніке;
упэўнены, што яна і ў табе”, - піша Павел. У гэтых біблійных сведчаннях, - працягнул
Свяцейшы Айцец, - сямья ўключае сябе не толькі бацькоў і дзяцей, але і бабак і дзядоў
і далёкіх продкаў. Такім чынам, сямья выяўляецца, як грамада пакаленняў і гарантыя
спадчыны традыцый. Ніхто з людзей не даў сам сабе жыццё і не атрымаў сам элементарны
жыццёвы вопыт. Усе мы атрымалі ад іншых жыццё і асноўныя веды аб ім, усе мы закліканы
асягнуць дасканаласці ва ўзаемаадносінах любові з іншымі. Сямья, заснаваная на непарушным
саюзе мужчыны і жанчыны, выяўляе гэтае вымярэнне, заснаванае на адносінах з іншымі,
на сыноўстве і супольным жыцці, з’яўляецца тым асяроддзем, дзе чалавек можа нарадзіцца,
маючы годнасць, расці і ўсебакова развівацца. Калі нараджаецца дзіця, то пры пасрэдніцтве
адносінаў з бацькамі яно робіцца часткай сямейнай традыцыі, што мае яшчэ больш глыбокія
карані. Разам з дарам жыцця яно атрымлівае ў спадчыну вопыт. Што ж тычыцца гэтага,
то бацькі маюць права і забавязаны перадаваць яго дзецям: весці іх да раскрыцця ўласнай
ідэнтычнасці, уводзіць іх у грамадскае жыццё, надаваць ім здольнасць любіць і быць
любімымі; і, перад усім, весці да спаткання з Богам. Дзеці растуць у чалавечым сэнсе
у той меры, у якой прыймаюць з даверам гэту спадчыну і выхаванне, якое паступова прыймаюць.
Такім чынам яны набываюць здольнасць самастойна зводзіць у адно тое, што атрымалі,
і тое, чаму навучыліся, і да гэтага закліканы кожны, кожнае пакаленне. У вытоках
кожнага чалавека і, без сумніву, у вытокаў чалавечага бацькоўства і мацярынства, знаходзіцца
Бог-Стварыцель. Таму сужонцы павінны прыймаць народжанае дзіця не толькі як уласнае,
але і як дзіця Бога, Які палюбіў яго такім, якім яно ёсць, і заклікаў яго да боскага
ўсынаўлення. У далейшай частцы свайго казання Свяцейшы Айцец звярнуў увагу на
тое, што хрысціянская сямья перадае веру тады, калі бацькі вучаць дзяцей малітве і
моляцца разам з імі; калі бацькі набліжаюць дзяцей да Таямніцаў і ўводзяць у жыццё
Царквы; калі разам збіраюцца дзеля чытання Бібліі, поўнячы сямейнае жыццё святлом
веры і ўшанаваннем Бога Айца. У сучаснай культуры вельмі часта ўзносіцца свабода
індывідыума, які ўспрыймаецца, як аўтаномны суб’ект – нібыта ён сам сябе стварыў і
з’яўляецца самадастатковым, - не прыймаючы пад увагу яго адносінаў з іншымі. Грамадскае
жыццё будуецца толькі на аснове суб’ектыўных, зменлівых жаданняў, пры гэтым ні ў якім
разе не ўлічваецца пачатковая аб’ектыўная праўда – годнасць кожнага чалавека і яго
правы і абавязкі, на служэнні якім павінна засноўвацца кожная сацыяльная суполка. Царква
нястомна прыпамінае, што чалавек мае сапраўдную свабоду таму, што ён створаны па падабеству
Бога. Таму хрысціянскае выхаванне – гэта выхаванне свабоды і дзеля свабоды. “Мы, -
сказаў Бенедыкт XVI°, - робім дабро не як рабы, не вольныя дзейнічаць па-іншаму, але
таму, што мы асабіста маем адказнасць за ўсё; таму што нам падабаецца праўда і дабро,
мы любім Бога і Ягоныя стварэнні. Вось сапраўдная свабода, да якой нас хоча прывесці
Святы Дух”. У заключнай частцы сваёй прамовы Папа зазначыў: такім чынам, хрысціянская
сямья – бацька, маці і дзеці – заклікана крочыць да мэты, якая не дадзена звонку,
але ўказана як дар Божай Ласкі, якая была пасланая сужонцам у Таямніцы шлюбу. Калі
яны будуць заўсёды адкрытыя да Святога Духа, калі будуць прасіць у Яго дапамогі, Ён
будзе нястомна праводзіць да іх любоў Бога Айца, што адкрылася і ўцелавілася ў Хрысце.
Прысутнасць Духа дапаможа сужонцам не губляць крыніцу і вымярэнне іх любові і іх узаемаадносінаў,
а таксама супрацоўнічаць з Iм дзеля таго, каб адлюстраваць і здзейсніць яе ва ўсіх
аспектах уласнага жыцця. У той жа час Дух абудзіць у іх жаданне канчатковага спаткання
з Хрыстом у доме Ягонага Айца. У гэтым – пасланніцтва надзеі, якое я жадаю накіраваць
з Валенсіі ўсім семьям свету. Амэн! Паважаныя сябры, мы перадалі, у скароце, казанне
Свяцейшага Айца Бенедыкта XVI°, якое Папа прамовіў пад час нядзельнай Святой імшы,
адцэлебраванай ім пад час пастырскага падарожжа ў гішпанскі горад Валенсія.