(10.7.2006 R.V.)Shkodra dhe Shqipëria
i dhanë lamtumirën e fundit kryetarit të parlamentit të parë të Shqipërisë demokratike
Pjetër Arbnorit. Në ceremoninë fetare të meshës së dritës në Katedralen e Shkodrës
të kryesuar nga kryeipeshkëvi metropolit Imzot Angjelo Masafra dhe në ritin e salikimeve
në varrezat e Rrmajit, morën pjesë autoritete të larta shtetërore, civile nga Shqipëria
dhe Kosova si edhe një numër jashtëzakonisht i madh qytetarësh. Me vdekjen e Pjetër
Arbnorit politika dhe shoqëria shqiptare humbën një kultivues të vlerave njerëzore
dhe demokratike. Endrra e tij ishte një Shqipëri e lirë e zhvilluar dhe demokratike.
Por më hollësisht mbi lamtumirën që Shkodra i dha bashkëqytetarit të vet të nderuar
të ndjekim shërbimin e Jolanda Babës...
Në pikëllimin e Shkodrës
dhe të Shqipërisë mori pjesë edhe Kosova. Nga Prishtina na informon Rabije Ibraj...
Në
Ingusheti u vra Qamil Basajevi, komandanti i guerriljes çeçene. Sipas njoftimeve të
para Basajevi së bashku me disa terroristë të tjerë po udhëtonte në një kamion të
mbushur me eksploziv që u hodh në erë nga forcat specile ruse. Mendohet se terroristët
po përgatisnin një atentat tjetër në prag të mbledhjes së G.8 në Moskë. Presidenti
Putin tha se ky ishte fundi që Basajevi meritonte për të gjitha atentatet kundra të
pafajshëmve.
Një aeroplan Fokker i shoqërisë pakistane të fluturimeve u
rrëzua sot në Pakistan porsa u ngjit në ajër nga pista e Multanit në lindje të vendit.
Që të gjithë 45 udhëtarët vdiqën në vend. Nuk dihen ende me siguri shkaqet e fatkeqësisë
por autoritetet policore mendojnë se ishte një defekt teknik dhe jo një akt terrorist.
Në
Irak vijojnë hakmarrjet ndërmjet myslimanëve sunitë dhe shiitë. Një ditë pas masakrës
së 42 sunitëve, sunitët morën hak duke vrarë me atentat 14 shiitë dhe plagosur 60
të tjerë. Gjithashtu pati tre të vdekur dhe 16 të plagosur në një atentat kundër zyrës
së partisë kurde në Kirkuk, ndërsa në verilindje të Bagdadit rebelët vranë një anëtar
të qeverisë.
Ndonëse Kina është kundër një rezolute të menjëhershme për
çështjen e raketave me rreze të gjatë veprimi të Koresë së Veriut, ka shumë mundësi
që Këshilli i Sigurimit sot apo nesër të votojë një dokument që dënon manovrat e fundit
ushtarake të qeverisë koreanoveriore.