Kryeipeshkëvija Tiranës-Durrës ka ipeshkëvin e ri ndihmës. Ati i Shenjtë Benedikti
XVI emëroi Ipeshkëv-Ndihmës të Tiranë-Durrësit, Atë Gjergj Frendon, domenikan.
(7.7.2006 RV)Ipeshkvit
të ri, që është rregulltar i Urdhërit të Predikatarëve (dominikan), dhe Vikar i përgjithshëm
i së njëjtës Kryedioqezë, iu caktua njëkohësisht edhe selia titullare e Butrintit. Jetëshkrimi
i ipeshkvit të ri: Atë Gjergji ka lindur në Qormi të Maltës më 4 prill 1946,
ku edhe u pagëzua me emrin Anthony (Anton). Më 1962 hyri në Urdhërin e Predikatarëve.
Nisi menjëherë studimet filozofike e teologjike në Kolegjin Filozofiko-Teologjik Dominikan
të Rabatit në Maltë, ku edhe bëri kushtet e përjetshme në vitin 1967 dhe u shugurua
meshtar më 7 prill 1969. Në vitin 1973 u diplomua në Romë në Drejtësi Kanonike
pranë Universitetit Papnor të Shën Tomës (Angelicum). U kthye në Maltë ku dha mësim
në Kolegjin Dominikan të Rabatit dhe në Fakultetin e Teologjisë në Maltë. Nga
viti 1974 deri në vitin 1996 kreu disa detyra në urdhërin Dominikan: qe mësues i novicëve,
epror kuvendi, famullitar provincial; ndërsa në Kryedioqezën e Maltës: Avokat e gjykatës
i Gjykatës Ndërdioqezane të shkallës së dytë. Nga viti 1992 deri më 1996 ka qenë Kryetar
i Konferencës së Eprorëve të Mëdhenj të Maltës. Nga viti 1997 ndodhet në Shqipëri
ku, duke nisur nga viti 1998, kryen detyrën e Vikarit të Përgjithshëm të Kryediqezës
së Tiranës e, nga viti 2001, atë të zevendës-gjyqtarit të Gjykatës Ndër-Dioqezane
të shkallës së parë. Nga viti 1999 deri më 2005 ka qenë Kryetar i Konferencës së Eprorëve
të Mëdhenj në Shqipëri e, nga viti 2001 deri më 2005, ka qenë anëtar i Këshillit ekzekutiv
të Bashkimit të Konferencave Evropiane të Eprorëve të Mëdhenj. Flet mirë anglishten,
italishten e shqipen. Të ndjekim intervistën që Ipeshkvi i ri i dha Programit të
gjuhës shqipe pranë Radio Vatikanit menjëherë pas shpalljes së lajmit.