Në Sallën e Palit VI - takim festiv i Papës me kryeipeshkvijtë që morën Palion
(30.6.2006 RV)Atmosferë festive sot në Sallën e Palit VI në Vatikan: Benedikti
XVI u takua me kryeipeshkvijtë metropolitë, që morën dje Palion dhe me familjarët,
miqtë e përfaqësuesit e dioqezave të tyre. Gëzimi e përzemërsia ishin dy ndjenjat
që ranë më shumë në sy gjatë këtij takimi në Sallën e Palit VI. Ndërmjet 27 ipeshkvijve
që morën dje Palion, spikatën kardinali Kreshencio Sepe, kryeipeshkëv i ri i Napolit
dhe kardinali Horhe Liberato Uroza Savino, kryeipeshkëv i Karakasit. Kujtojmë
se 11 nga 27 metropolitët e rinj vijnë nga Amerika, 8 nga Evropa, 5 nga Afrika e 3
nga Azia. “Larmia e vendeve prej nga vijnë, shpreh natyrën katolike të Kishës:
nga të katër anët e tokës besimtarët e Kishave të veçanta e ndjejnë veten të lidhur
me Selinë e Shën Pjetrit me një lidhje të posaçme, e cila shprehet edhe në simbolin
liturgjik të palios, që morën Metropolitët e tyre”. Kështu u shpreh Papa
dhe më pas shpjegoi domethënien e Palios: stolë e thurur me lesh qengji, simbol i
Jezusit, Qengjit të Hyjit që shlyen mëkatet e botës, Bariut të Mirë, që ruan grigjën
e vet të dashur. Zoti – tha Papa- vijon të kujdeset për popullin e vet, të cilin nuk
e lë kurrë pa barinj e prijës të sigurtë. “Nuk mund të mos ndërgjegjësohemi
se secili nga ne, sipas frymëzimit, është i thirrur të punojë me zell në vreshtin
e vet, për të qenë kështu të gjithë, gjymtyrë të gjalla të Korpit të tij mistik, që
është Kisha. Ne përdoremi si gurë të gjallë për ngritjen e një ndërtese shpirtërore
– na kujton Shën Pjetri Apostull – që të ofrojmë flije shpirtërore të pëlqyeshme për
Zotin, përmes Jezu Krishtit”. Në përfundim të takimit, Papa u lut Virgjërës
Mari, Nënës së Kishës, t’i ndihmojë barinjtë për t’i qëndruar gjithnjë besnikë misionit
të tyre.