(29.6.2006 R.V.)Koloni izraelit, rrëmbyer nga Hamasi u gjet sot i vrarë, ndërsa
ende nuk dihet gjë për fatin e ushtarit që u zu rob nga terroristët të dielën. Si
kundërpërgjigje dje dhe sot ushtria izraelite sulmoi bazat e Hamasit si edhe arrestoi
tetë ministra dhe 20 deputetë palestinezë, kurse zëvendëskryeministri i qeverisë së
Hamasit, Nasser A-Sher arriti të shpëtojë.
Në Irak 60 punëtorë të një rafinerie
u morën peng nga rebelët por u liruan menjëherë. Ndërsa në planin politik kryeministri
rumun Calin Popescu Tariceanu deklaroi se ushtarët rumunë do të tërhiqen nga Iraku
në nëntor apo dhjetor. Me tërheqjen e italianëve, shpjegoi kryeministri, trupat e
Bukureshtit do të mbeten pa mbështetje logjistike, gjë që e bën të nevojshëm kthimin
e tyre në atdhe.
Admirali amerikan Henry Ulrich, vizitoi sot komunën me
shumicë serbe të Leposaviqit në Kosovë. Ndër tjera ushtaraku pohoi se forcat amerikane
janë të vendosura të ruajnë rregullin dhe qetësinë në Kosovë. Leposaviqi është një
nga tri komunat që para një muaji shpallën gjendjen e jashtëzakonshme.