Shqetësimi i Benediktit XVI për të krishterët e Lindjes së Mesme
(22.6.2006 R.V.)Sot, duke pritur në audiencë pjesëmarrësit në punimet e Asamblesë
së 75-të të përgjithshme të ROAKO-së ( Bashkimit të Veprave të Ndihmës për Kishat
Lindore), Papa Benedikti XVI i nxiti t’u japin ndihmesën e vet bashkësive katolike
lindore e posaçërisht atyre të Tokës Shenjte. ROAKO (Bashkimi i Veprave të Ndihmës
për Kishat Lindore), organizëm përmbledhës i Agjensive dhe Veprave të vendeve të botës,
që impenjohen në mbështetjen financiare të sektorëve të ndryshëm, nga ai i ndërtimit
të vendeve të kultit, tek bursat e studimit; nga institucionet edukative e shkollore,
tek ato shoqëroro-shëndetësore, këto ditë organizoi Asamblenë e 75-të të përgjithshme.
Ndërmjet temave në diskutim, u theksua posaçërisht roli i shkollave katolike në Tokën
Shenjte dhe gjendja e të krishterëve në Iran. E sot Papa Benedikti XVI, duke
i pritur pjesëmarrësit e asamblesë në audiencë në Vatikan, u shprehu atyre mirënjohjen
për shërbimin që kryejnë që nga viti 1968, duke u dhënë zë Kishave të traditave të
ndryshme lindore dhe atyre latine në territoret që i janë besuar Kongregatës për Kishat
Lindore, duke mbështetur veprimtaritë baritore, edukative dhe asistenciale e duke
i ndihmuar në raste nevojash urgjente. Lidhur me veprimtaritë bamirëse kishtare,
Ati i Shenjtë porosit të punohet me edukatorët dhe veprimtarët e bamirësisë “për
t’u edukuar zemrat”. E kështu mund të arrihet në atë takim me Zotin, në Krishtin,
që e bën njeriun ta hap zemrën e ta shikojnë dashurinë për të afërmin jo si urdhërim
që jepet nga jashtë, por si pasojë e fesë, e cila bëhet veprën dashurie. Papa
u drejtoi një përshëndetje tepër të përzermërt bashkësive katolike lindore e posaçërisht
atyre të Tokës Shenjte, të cilat ndihmohen nga ROAKO. Shprehu, më pas, dëshirën e
vet e të gjithë të krishterëve që në tokën ku lindi Jezusi të mos mungojë kurrë një
bashkësi e krishterë plot gjallëri. Duke i njohur vështirësitë që po kalon kjo bashkësi,
atmosferën e pasigurisë në të cilën jeton, mungesën e punës, kufizimet e panumërta,
që kanë si pasojë rritjen e varfërisë, Ati i Shenjtë theksoi se të gjitha këto pengesa
e vështirësi e bëjnë të paqartë ardhmërinë edukative, profesionale e familjare të
breznive të reja, të cilat tundohen fuqimisht ta braktisin përgjithnjë tokën ku kanë
lindur. Një gjë e tillë vërehet edhe ndër zona të tjera të Lindjes së Mesme si Iraku
e Irani, ku kryen veprimtarinë bamirëse ROAKO, që Papa e nxiti të vijojë me zell ndihmën
në këto zona, sidomos në Tokën Shenjte.