Në audiencën e përgjithshme Benedikti XVI porositi: të mësojmë nga Shën Jaku gatishmërinë
për ta ndjekur pas Jezusin
(21.6.06 R.V.)Të
njohim jetën e Apostujve, për të mësuar se feja është rrugë që na çon drejt pjekurisë.
Këtë dëshiron t’u mësojë Benedikti XVI besimtarëve përmes katekizmit të audiencës
së përgjithshme. E sot në Sheshin e Shën Pjetrit Ati i Shenjtë foli për Shën Jakun,
të birin e Xebedeut, që mbiquhet i Madh, rruga e jetës të të cilit simbolizon gjithë
shtegtimin e jetës së krishterë. Të ndjekësh gjurmët e Krishtit, do të thotë të
braktisësh skemat që të krijojnë siguri. E për këtë – tha Benedikti XVI – duhet të
ndjekim shembullin e Shën Jakut të Madh, birit të Xebedeut. Ungjijtë na rrëfejnë se
ishte biri i Gjonit e se gëzonte autoritet aq të madh në Kishën e të krishterëve të
parë në Jeruzalem, sa përgjigjej për veprimtarinë baritore, së bashku me Shën Pjetrin.
Gjatë katekizmit, Papa shpjegoi se edhe Jaku ishte peshkatar i thjeshtë e se, ashtu
si Pjetri, iu përgjigj me gatishmëri thirrjes së Jezusit, duke lënë varkën e babain
me shegertët. E zelli i tij për të ecur pas Krishtit ishte aq i rrëmbyer, sa Jezusi
i quajti atë e të vëllaun “Boanerghes”, bijtë e bubullimës. E kjo ndoshta sepse të
bijtë e Xebedeut janë protagonistë të ngjarjes që ndodhi në një fshat samaritanësh,
banorët e të cilit nuk deshën ta mikpresin Jezusin. “Zot, a dëshiron të themi që të
zbresë zjarr nga qielli e t’i bëjë hi e pluhur?” - pyesin dy nxënësit, në sa Zoti
u përgjigjet me një qortim. Në se kundërveprimi i Jakut e i Gjonit diktohet nga dashuria
për Mesinë, Jezusi mëson mospërdorimin e dhunës; Jaku do ta mësojë këtë më vonë, ashtu
si do të kuptojë, pasi kërkon një trajtim të posaçëm në mbarimin e kohës, se të ndjekësh
Krishtin do të thotë të pish së bashku me të një kelk tepër të hidhur. Por Papa nënvizoi
vetëm disa aspekte nga jeta e Apostullit: “Është vapë e madhe e prandaj dua
t’ bie për shkurt, duke kujtuar vetëm dy nga këto raste - tha me të qeshur Ati
i Shenjtë, fjalët e të cilit u pritën me duartrokitje. E kam fjalën për shndërrimin
mbi malin Tabor dhe agoninë në Kopshtin e Ullinjve. Janë raste që tregojnë në mënyrë
të veçantë sesi nxënësi mësoi ç’kishte ndër mend të bënte Mesia. Por përvoja e vërtetë,
që do ta çonte drejt pjekurisë, do të ishte e dyta, ajo e Kryqit: “Është sigurisht
kjo përvojë e dytë, që i krijoi rastin të fitonte pjekurinë….. atij iu desh të parandjejë
se Mesia, i pritur si ngadhënjimtar, në të vërtetë nuk ishte i rrethuar vetëm me nderime
e lavdi, por edhe me vuajtje e ligështi, se lavdia e Krishtit realizohet pikërisht
në Kryq, në pjesëmarrjen e Tij ndër vuajtjet tona”. Më pas Papa kujtoi traditën
lidhur me figurën e Apostullit: atë që tregon se ai ungjillëzoi Spanjën e se trupi
i tij pushon në paqe në Santiago të Kompostelës. Së fundi Benedikti XVI e përmblodhi
kështu çka duhet të mësojmë nga përvoja e Jakut: “… gatishmërinë për ta pranuar
thirrjen e Jezusit edhe kur na kërkon ta lemë varkën e sigurive tona njerëzore, ndjekjen
e Tij me entuziazëm në rrugët që na tregon, larg çdo mendjemadhësie; gatishmërinë
për ta dëshmuar me guxim, e në se është e nevojshme, deri në flijimin më të lartë,
deri në dhurimin jetës”. E, duke lënë mënjanë tekstin zyrtar, Papa e përfundoi
katekizmin me këto fjalë: “Rruga jo vetëm e jashtme, por sidomos shpirtërore
nga Mali i Shndërrimit në Malin e Agonisë simbolizon gjithë shtegtimin e jetës së
krishterë ndërmjet persekutimit të botës e ngushëllimit të Zotit, siç thotë edhe Koncili
II i Vatikanit. Duke ecur pas Jezusit, si Shën Jaku, e dimë, edhe ndër vështirësi,
se jemi duke ecur në rrugë të drejtë”. Në përshëndetjet drejtuar shtegtarëve,
Ati i Shenjtë kujtoi solemnitetin e Zemrës së Shenjtnueshme të Jezu Krishtit, që do
të kremtohet të premten e ardhshme. Është festa në të cilën, në mënyrë të posaçme,
lumnojmë dashurinë e Hyjit – pohoi Papa – e prandaj lutemi që të gjithë njerëzit ta
kremtojnë me paqe e gëzim. Së fundi Benedikti XVI i nxiti të rinjtë, të sëmurët
e bashkëshortët e sapomartuar, të pranishëm në audiencë, të kërkojnë ndërmjetësimin
e Shën Luigj Gonzagës, që Kisha katolike e kremtoi sot. Shembulli i Shenjtit – tha
Papa - na ndihmoftë ta vlerësojmë virtytin e pastërtisë ungjillore, t’i përballojmë
vuajtjet duke gjetur ngushëllim në Krishtin e kryqëzuar e na priftë drejt një dashurie
gjithnjë më të thellë për Zotin.