(20.6.’06.R.V.)15 persona u vranë nga
një sulm ajror amerikan në veri të Bagdadit. Dëshmitarët thanë se të gjitha viktimat
i përkisnin së njëjtës familje dhe se ishin bujq. Gjithashtu në kryeqytet nuk munguan
as atentatet e rebelëve. Një kamikaze u hodh në erë në mes të një turme të moshuarish,
ndërsa ushtria amerikane bëri të ditur se u gjenden trupat e dy ushtarëve marrë peng
nga Al Kaeda javën e kaluar. Nuk dihet ende fati i 4 diplomatëve rusë, që së bashku
me ushtarët amerikanë gjendeshin në duar të rebelëve.
Autoritetet pakistane
vendosën të dërgojnë në zonën e Kurrumit trupa paraushtarake për të dhënë fund një
beteje të vërtetë për ujin ndërmjet dy fiseve kundërshtare në afërsi të kufirit me
Afganistanin. Në këto përleshje deri tani kanë vdekur 5 persona.
“Irani
duhet të braktisë çdo ambicje për të prodhuar armë bërthamore.” Kështu u shpreh presidenti
amerikan Xhorxh Bush duke folur dje në Akademinë e Marinës Tregtare në Nju Jork. “Në
rast se nuk bashkëpunon Teherani do të izolohet gjithnjë e më shumë nga bota dhe do
të ketë sanksione politike ndaj tij.” paralajmëroi presidenti Bush.
Zëdhënësi
i presidentit palestinez Abu Mazen tha sot se presidenti i ka kërkuar të gjitha grupeve
të Hamasit të ndalojnë sulmet me raketa kasam kundra shtetit hebraik. Ndërkaq Partia
Al Fatah e presidentit Abu Mazen vijon bisedimet për një marrëveshje paqeje me Hamasin.
Japonia
parashikon një përgjigje të ashpër nëse Korea e Veriut do të provojë raketën e re,
e cila sipas burimeve të ndryshme do të jetë në gjendje të mbërrijë deri në Alaskë.
Ndërsa sekretarja e shtetit amerikan Kondoliza Rajs e vlerësoi hedhjen e raketës nga
ana e Koresë së Veriut si një provokim të rëndë.
Në kuadrin e bisedimeve
për statusin e Kosovës presidenti i Kosovës Fatmir Sejdiu dhe kryeministri Agim Çeku
u pritën në Uashington nga sekretarja e shtetit Kondoliza Rajs. Gjatë takimit përfaqësuesit
kosovarë kërkuan pavarësi të plotë dhe të pakushtëzuar për Kosovën, ndërsa Rajs tha
se politikanët kosovarë duhet të jenë më fleksibël në lidhje me të ardhmen e vendit
të tyre si edhe të krijojnë besim te të gjitha pakicat kombëtare të pranishme në Kosovë.