(15. 06. 06. R.V.)Sot u kremtua festa e Korpit të Krishtit: Benedikti XVI kryesoi,
duke nisur nga ora 19. 00, Meshën në Sheshin e Shën Gjonit në Lateran dhe proçesionin
që sapo filloi në rrugën e njohur Merulana, në zemër të Romës, në drejtim të Bazilikës
së Shën Marisë së Madhe, ku përfundon kremtimi. Me rastin e festës së sotme
të Corpus Domini – Korpit të Krishtit, Benedikti XVI kryesoi sot pasdite Meshën
Shenjte në Sheshin e Shën Gjonit në Lateran në bashkëkremtim me kardinaj, ipeshkvij
e meshtarë të shumtë nga dioqeza romake dhe nga mbarë bota. Kujtojmë se që ditën
e parë pas zgjedhjes së tij, duke folur për Eukaristinë, Benedikti XVI pati theksuar
se nuk mund të mos jetë qendër e përhershme dhe burim i shërbimit që i është besuar
pasardhësit të Shën Pjetrit. Gjatë Meshës në Kapelën Sikstine, më 20 prill 2005,
shpjegoi se nga Eukaristia, ‘zemër e jetës së krishterë’, buron bashkimi ndërmjet
mbarë besimtarëve, impenjimi i kumtimit dhe i dëshmimit të Ungjillit, zelli për t’u
bërë mirë të gjithëve e posaçërisht më të varfërve e më vegjëlve. E i ftonte besimtarët
ta shprehin në mënyrë të guximshme e të qartë fenë në praninë reale të Zotit në Eukaristi. Pas
Meshës filloi proçesioni, të cilit i prinë Skautët, të ndjekur nga Bashkëvëllazëritë
e Shoqatat Eukaristike, pas të cilave përfaqësuesit e famullive, ministrantët e rinj,
Kalorësit e Varrit të Shenjtë, rregulltarë e rregulltare, meshtarë e famullitarë,
kapelanë e ipeshkvij, kryeipeshkvij e kardinaj. Të Shenjtnueshimin Sakrament e ndoqën
pas seminaristët, besimtarët e shumtë të famullive si dhe anëtarët e Shoqatave dhe
Lëvizjeve të ndryshme kishtare. Tani mbarë Kisha është në pritje të Nxitjes Apostolike
të Benediktit XVI, që do të pasojë Sinodin mbi Eukaristinë, i cili u mbajt në tetorin
e kaluar. Mbi festën e Korpit të Krishtit të dëgjojmë kardinalin Frensis Arinze,
prefekt i Kongregatës për Kultin Hyjnor dhe Disiplinën e Sakramenteve:Përgjigje:
- Është dita në të cilën Kisha dëshiron të vërë theksin mbi misterin e madh të
Korpit e të Gjakut të Krishtit në Eukaristinë Shenjte. Zoti e themeloi Eukaristinë
të Enjten e Madhe. Por Kisha, me kalimin e kohës, zgjodhi një ditë tjetër për të vënë
në pah misterin Eukaristik, posaçërisht jashtë Meshës. Kështu shfrytëzoi rastin e
mrekullisë eukaristike së Bolsenës, ndonëse duhet theksuar se feja jonë nuk bazohet
mbi këtë mrekulli, por mbi zbulimin hyjnor të misterit. Atëherë mund të themi se dita
e sotme vë theksin mbi adhurimin e Jezusit në të Shenjtnueshmin Sakrament, gjatë Meshës
e jashtë saj. Kremtimi Eukaristik është vërtetë i lidhur me adhurimin e Eukaristisë
jashtë Meshe, sepse është i njëjti Sakrament që nuk mbaron kurrë, por vijon. Në përfundim
të Meshës, hostet që kanë mbetur pas Kungimit të popullit, rivendosen në Tabernakull.
E i njëjti Jezus vijon të jetë i pranishëm. Kështu, dalë-nga-dalë në Kishë lindi e
u zhvillua praktika e adhurimit eukaristik, vizita që i bëjnë besimtarët të Shenjtnueshmit
Sakrament e në veçanti, proçesioni eukaristik. Nuk mjafton ta adhurojnmë Krishtin
vetëm si individë. Është e drejtë që edhe si bashkësi të bëjmë një proçesion në nder
të Jezusit të pranishëm në të Shenjtnueshmin Sakrament, ta adhurojmë, ta duam, të
këndojmë himne në lavd të Zotit