Gjatë lutjes së Engjëllit të Tënzot në Solemnitetin e të Shenjtnueshmes Trini, Papa
nënvizoi të vërtetën e Njënisë dhe Trinisë së TynZot.
( 11. 06. 06 R. V. ) E ky solemnitet u kremtuanë të gjitha Kishat e
botës, posaçërisht në Romë, ku u mbajt një Meshë solemne në ritin mozarabik. Riti
na kujton shprehjen kulturore të Kishës spanjolle në epokën vizigote ( 410- 711) dhe
në Mesjetë; kremtohet në Kishën kombëtare spanjolle në Romë, përmes një privilegji
të posaçëm, dy herë në vit: në të dielën e tretë të Ardhjes, prelud i solemnitetit
të Krishtlindjes dhe në të dielën e të Shenjtnueshmes Trini, ditë në të cilën kalendari
liturgjik shënon kalimin nga koha e Pashkëve në kohën e zakonshme gjatë vitit kishtar.
E sot, kryesuar nga ipeshkvijtë austriakë, u organizua në të gjitha dioqezet
e vendit “Shtegtimi i Familjeve”. Shtegtimi u kremtua edhe në vendet fqinje, nën drejtimin
e ipeshkvijve vendas, për të kujtuar “Shtegtimin e Popujve” që u zhvillua në Shenjtëroren
e Mariazelit në maj të vitit 2004, në përfundim të “Katholitentag Mitteeuropeo”. Shtegtimi
i sotëm u frymëzua nga fjalët e Gjon Palit II: “Familja është gëzimi dhe shpresa e
Kishës” dhe vuri në plan të parë detyrën e familjeve për transmetimin e fesë.