(7/6/2006 R.V.)Komisari i lartë i OKB-së për refugjatët shprehu sot “shqetësim
të thellë” për 65 mijë të shpërngulurit e Timorit Lindor, që janë grumbulluar në kampe
refugjatësh të pasigurta. Ndërkaq në Dili po vazhdojnë bisedimet ndërmjet qeverisë
dhe rebelëve. Ramosh Horta, Ministri i Mbrojtjes i Timorit Lindor u takua sot me Alfredo
Reinadon kryetarin e rebelëve, i cili u tregua i gatshëm për të gjetur një rrugëdalje.
Të
armatosur me shkopinj dhe gurë, me qindra fshatarë brazilianë të pa tokë, hynë me
forcë në parlamentin e Brazilies dhe akuzuan presidentin Lula da Silva se nuk është
angazhuar sa duhet në zbatimin e reformës agrare. Rreth 26 vetë mbetën të plagosur
nga përleshjet me policinë dhe afro 400 fshatarë u arrestuan.
Parlamenti
i Filipineve miratoi sot një dokument që shfuqizoi vendimin me vdekje. Teksti i ligjit
do të bëhet i njohur në ditët e ardhshme nga Presidentja Gloria Arroyo. Ligji i miratua
njëzëri nga senati mbrëmë vonë, pasi ishte miratuar më parë me shumë vështirësi edhe
nga dhoma e deputetëve.
Vendet e Grupit të Kontaktit për Kosovën: Rusia,
Italia, Gjermania, Britania dhe Franca u paraqiten autoriteteve kosovare sot një dokument
prej 13 pikash që duhen plotësuar brenda gjashtë muajve të ardhshëm. Bëhet fjalë kryesisht
për përmirësimin e kushteve të jetesës së serbëve si edhe për miratimin e ligjit për
gjuhët në përdorim, krijimin e komisariateve të veçanta të policisë ku ka pakica serbe
etj.
“Duhet të liberalizojmë vizat për turistët që duan të vizitojnë Shqipërinë.”
Kështu u shpreh gjatë mbledhjes së sotme të Këshillit të Ministrave, kryeministri
Sali Berisha. Qëllimi i kësaj reforme, sipas kryeministrit, është që bregdeti shqiptar
të vizitohet vazhdimisht gjatë gjithë vitit nga turistët e huaj.