Lajme shoqërore-politike: 26 maj

Edhe sot, në plan të parë dhuna në Irak. Nëntë persona u vranë dhe më shumë se 50 u plagosën nga shpërthimi i katër bombave në zona të ndryshme të Bagdadit. Gjithnjë në kryeqytet trajneri i kombëtares së Irakut të tenisit dhe dy lojtarë u vranë sepse ishin në pantallona të shkurtëra.


Pas një ore e gjysmë bisedimesh presidenti Xhorxh Bush dhe kryeministri Toni Bler deklaruan për shtypin se kanë bërë gabime në Irak dhe se nuk e kishin menduar se lufta do të zgjaste kaq shumë. Megjithëkëtë, të dy udhëheqësit shprehën bindjen se Iraku nuk duhet lënë në dorë të terroristëve dhe se trupat ndërkombëtare nuk duhet të tërhiqen tani për tani.


Abu Hamza Al-Mazhzub, përfaqësues i xhihadit palestinez, u vra së bashku me të vëllanë sot në një atentat me bombë në Sidon, në jug të Libanit. Ndërkohë Izraeli vendosi që t’i dërgojë municione dhe armatim forcave të policisë besnike të presidentit Abu Mazen.


Nurpashi Kulajev, i vetmi terrorist që u kap i gjallë pas masakrës në shkollën e Beslanit në Oseti, u dënua me burg të përjetshëm. “Meritoni dënimin me vdekje – i tha gjykatësi të pandehurit – por nuk është e mundur sepse Rusia ka nënshkruar moratoriumin që nuk lejon ndëshkime kapitale.”


Gjendja në Mogadishu, Somali është akoma e nderë pas betejave të përgjakshme ndërmjet militantëve të shkollave kuranike dhe forcave qeveritare. Burimet spitalore njoftuan se deri tani ka rreth 60 të vdekur dhe më shumë se 150 të plagosur. Popullata po largohet në masë nga kryeqyteti i Somalisë për në zona më të sigurta.


Sudani pranoi më në fund që një mision i OKB-së dhe i Bashkimit Afrikan të vizitojë zonën e Darfurit për të përgatitur dërgimin e helmetave blu. Dhuna që shpërtheu në shkurt të vitit 2003 ka shkaktuar deri tani afro 2 milionë të shpërngulur dhe rreth 100-200 mijë viktima.
Për t’i prerë hovin krizës bërthamore iraniane, sekretari i këshillit të sigurisë kombëtare ruse, Igor Ivanov, do të takohet kësaj fundjave në Teheran me Ali Larianin, përfaqësues i Iranit. Lajmi u bë i njohur dje pas përfundimit të mbledhjes në Londër të grupit të pesë anëtarëve të përhershëm të Këshillit të Sigurimit të Kombëve të Bashkuara dhe Gjermanisë.


Senati amerikan miratoi me shumicë votash ligjin për emigracionin sipas të cilit forcohet mbikqyrja e kufirit por edhe legalizohen rreth 12 milionë klandestinë që aktualisht gjenden në SHBA-ës. Ligji kaloi falë 23 votave të deputetëve republikanë që iu bashkuan atyre të demokratëve.