Ja argumentet kryesore të programit të 25 majit: këtu mund të ndiqni emisionin e plotë
Papa Benedikti XVI filloi sot vizitën e tij apostolike në Poloni, në tokën e Gjon
Palit II. Vizita e dytë ndërkombëtare e Papës Racinger — rast i volitshëm për t’i
përforcuar besimtarët e krishterë në fé.
Në ditën e parë të vizitës së
tij në Poloni, Papa u prit nga mijëra e mijëra besimtarë në festë në Varshavë, ku
takoi autoritetet e larta shtetërore e kishtare të vendit. Pastaj në katedralen e
kryeqytetit Ati i Shenjtë zhvilloi një takim me meshtarët, gjatë të cilit trajtoi
sfidat e mëdha baritore që shqetësojnë kishën polake. “Nga meshtarët kërkohet të jenë
ekspertë të takimit të njeriut me Zotin dhe jo specialistë të ekonomisë apo të politikës.”
Ndërsa
sot pasdite në kishën luterane të Trinisë Shenjte, Papa Racinger u lut së bashku me
delegatët e kishave të ndryshme kristiane e të bashkësive kishtare jokatolike. Në
fjalimin e tij Papa kërkoi një shtytje të re në udhën e ekumenizmit e të përforcimit
të bashkimit në Krishtin.
Në shenj respekti për Papën, në të gjitha kafenetë
e Varshavës, tregtohen vetëm pije joalkoolike, ndërsa një pjesë e mirë e bareve ka
parapëlqyer t’i mbajë qepenat e ulura.
Nesër në ditën e dytë të vizitës,
Papa do të kremtojë në Varshavë Meshën Shenjte, për të vijuar pasdite shtegtimin në
shenjtëroren e Zojës së Bekuar të Jasna Gorës.
Udhëtimi i Papës në Poloni
do të mbyllet të dielën pasdite me vizitën e Tij në kampin e Aushvicit.
“Mjekët
pakufi” denoncojnë rrezikun e krizës humanitare në Darfur, si pasojë e mungesës së
ushqimeve për të evakuarit.
Kisha kineze humbi kryeipeshkvin e Ksianit,
Li Duanin, njeriun e dialogut që gjithmonë mbrojti lirinë fetare në Kinë.
Edhe
sot në Irak pati shumë atentate që shkaktuan viktima. Ndër to u plagos edhe një funksionar
i qeverisë së Bagdadit.
Në Somali, pas dy javë paqeje, shpërtheu përsëri
lufta ndërmjet trupave të shkollave kuranike, që përpiqen për imponimin e sherijatit
dhe forcave qeveritare. Ka mbi 30 të vdekur dhe shumë të plagosur. Civilët po braktisin
gjithnjë e më tepër kryeqytetin Mogadishu.
Burimet palestineze pohojnë
se Hamasi pranoi që presidenti Abu Mazen të udhëheqë negociatat me Izraelin si Autoritet
Kombëtar i Palestinës dhe të administrojë financat e vendit.
Në Mal të
Zi opozita unioniste luajti sot pasdite kartën e vet të fundit duke bërë apel kundër
rezultateve të referendumit që të dielën sanksionoi ndarjen e Malit të Zi nga Serbia,
pjesa e fundit e mozaikut të ish-Jugosllavisë. Pretendimet e opozitës u vlerësuan
nga përfaqësuesi i Bashkimit Evropian Lajçak si krejtësisht joserioze e të pabaza.