Benedikti XVI priti kryeministrin polak Marçinkieviç
(18.05.06 R.V.)Sot paradite Benedikti XVI priti edhe kryeministrin polak, Kazimierz
Marçinkieviç, pikërisht një javë para fillimit të shtegtimit të tij baritor në Poloni,
më 25 majin e ardhshëm. E dje, gjatë audiencës së përgjithshme, ndërmjet përshëndetjeve
në gjuhë të ndryshme, posaçërisht domethënëse ishte ajo që Papa u drejtoi shtegtarëve
polakë, të cilëve u kujtoi vizitën që do të bëjë në atdheun e Gjon Palit II nga 25
deri më 29 maj: “CIESZE SIE ZE NIEBAWEM BEDE MOGL ODWIEDZIC POLKE…“Gëzohem
që pas pak do të vizitoj Poloninë. Kjo vizitë do të zhvillohet me moton: “Qëndroni
të fortë në fe!”. Që sot kërkoj nga ju dhe nga gjithë Polonia të luteni, që në këto
ditë, me ndihmën dhe hirin e Zotit, ta përforcojmë njeri-tjetrin në dëshmimin e fesë.
Shërbëtori i Zotit Gjon Pali II na shoqëroftë!”.