Rusia dhe Kina nuk do të autorizojnë përdorimin e forcës për të zgjidhur krizën ndërkombëtare
të shkaktuar nga programi bërthamor iranian. Kështu deklaroi sot Ministri i jashtëm
i Rusisë Sergej Lavrov gjatë vizitës që po zhvillon në Pekin. Ndërkohë Teherani përsëriti
se nuk do të pranojë asnjë kërkesë të BE-ian për ndërprerjen e pasurimit të uraniumit
në këmbim të ndihmave në degën bërthamore për përdorim civil.
Forcat qeveritare
irakiane kapën rob një nga bashkëpunëtorët më të ngushtë të Al-Zarkavit, terroristit
të njohur si mëkëmbës i Bin Ladenit në Irak. Gjithashtu në Bagdad rinisi procesi kundër
Sadam Hyseinit, i cili nuk u paraqit fare në sallë të gjyqit.
“Prerja e
fondeve Autoritetit Palestinez nuk zgjidhë asgjë, por përkundrazi vetëm sa do të përkeqësojë
gjendjen që qysh tani mund të quhet e rëndë”- tha sot presidenti palestinez Abu Mazen
në fjalën drejtuar Parlamentit Evropian në Strasburg.
“Terrorizëm, pengmarrje
e rëndë dhe vrasje e shumëfishtë. Këto ishin akuzat për të cilat u dënua i vetmi terrorist
që u kap i gjallë pas sulmit në shkollën e Besllanit, në shtator të 2004. Nga përleshjet
mes terroristëve dhe policisë atë herë mbetën të vrarë 331 vetë, shumica fëmijë.
6
mijë ushtarë të Rojës Kombëtare amerikane do të rreshtohen përgjatë kufirit të SHBA-së
me Meksikën për t’i bërë ballë emigracionit të paligjshëm; një program afatgjatë për
të lehtësuar dhënien e lejeve të punësimit të përkohshëm. Në këto dy pika mbështetet
plani i presidentit Bush për zgjidhjen e problemeve të emigracionit në SHBA-ës.
Kthesë
në marrëdhëniet diplomatike ndërmjet SHBA-ës dhe Libisë. Pas afro 25 vjetësh ndërprerje
këto dy vende lajmëruan rihapjen e ndërsjelltë të përfaqësive diplomatike. Së shpejti
pritet edhe që Libia të hiqet nga lista e vende që financojnë terrorizmin ndërkombëtar.
Pas
tri ditësh trazira dhe përleshjesh ndërmjet policisë dhe mafies, duket se në Brazil
u rikthye rendi publik. Shkak për trazirat ishte bërë transferimi i 165 të burgosurve
të rrezikshëm në një burg të sigurisë së lartë. Për rivendosjen e rendit ndihmoi dukshëm
një tavolinë e rrumbullakët e autoriteteve dhe rebelëve.
Në Sudan, Bashkimi
Afrikan i dha edhe dy javë kohë grupeve rebele që luftojnë në zonën e Darfurit për
të nënshkruar marrëveshjen e paqës me qeverinë e Kartumit. Traktati i paqes i hartuar
nga Bashkimi Afrikan parashikon çarmatosjen e trupave filoqeveritare dhe amnistinë
për luftëtarët e palës tjetër.
Për të baraspeshuar prodhimin dhe shpërndarjen
e energjisë elektrike në Shqipëri qeveria Berisha parashikon ndërtimin e një termocentrali
të ri në Vlorë, një tjetër më të fuqishëm në Korçë dhe rinovimin e plotë të atij të
Fierit. Lajmi u bë i ditur dje gjatë një takimi të kryeministrit Sali Berisha me biznesmenët.