Fjalët e Papës Benedikti XVI drejtuar dje pjesëmarrësve në mbledhjen plenare të Këshillit
Papnor për Emigrantët dhe Endacakët, janë në qëndër të vëmendjes në takimin që vijon
punimet pranë Pallatit të Shën Kalistit në Romë. Intervistë e kardinalit Renato Rafaele
Martino, kryetar i ri i dikasterit
(16. 05. 06 R.V.)Në
Pallatin e Shën Kalistit në Romë, vijojnë punimet e mbledhjes plenare të Këshillit
Papnor të baritorisë për emigrantët dhe endacakët. Dje pjesëmarrësit u pritën në audiencë
nga Benedikti XVI. Në fjalimin që u drejtoi, Papa nënvizoi sidomos temën e dialogut
ndërfetar dhe të reciprokësisë ndërmjet feve. Sotkardinali Martino
reflekton mbi këto dy pika, në mikrofonin e Radio Vatikanit: Përgjigje:
- Në të vërtetë vetëm dialogu ndërmjet qytetërimeve të ndryshme dhe përpjekja për
mirëkuptim të anasjelltë, mund t’u krijojnë të gjithëve kushtet për një ardhmëri më
të mirë. Duhet të vijojmë të ndërtojmë ura miqësie ndërmjet ndjekësve të feve të ndryshme.
Posaçërisht të krishterët dhe myslimanët, siç është shprehur qartë vetë Papa në Këln,
gjatë Ditës Botërore të Rinisë, duhet t’u bëjnë ballë së bashku shumë sfidave të kohës
sonë. Dialogu ndërfetar e ndërkulturor ndërmjet tyre nuk mund të kufizohet në veprimtari
që mund të organizohen ose jo, sipas dëshirës të njërës apo tjetrës palë. Dialogu
është nevojë jetike, sepse nga ai varet në një masë të madhe vetë ardhmëria jonë.
Benedikti XVI e di mirë se emigrantët dhe endacakët mund të jenë ura të gjalla miqësie,
por mund të shndërrohen edhe në mjete të urrejtjes e të konflikteve, siç na e ka mësuar
shpesh historia. Duhet të nxjerrim mësime nga e kaluara, të kërkojmë rrugët e pajtimit
e të jetojmë duke respektuar edhe identitetin e tjetrit, për të mos përsëritur të
njëjtat gabime. Pyetje: - Cili është urimi Juaj, Hirësi, për punimet e Plenares
suaj të parë si Kryetar i dikasterit?Përgjigje: - Shpresoj që puna jonë
këto ditë të japë kontribut për plotësimin e dëshirës së thellë, shprehur nga Papa
Benedikti XVI gjatë Ditës së cituar Botërore të Këlnit: “Në se së bashku do të arrijmë
të zhdukim nga zemrat çdo gjurmë mllefi, në se do të rezistojmë përballë çdo forme
të intolerancës dhe do t’i kundërvihemi çdo shfaqjeje të dhunës, atëherë sigurisht
që do të jemi në gjendje ta prapsojmë valën e fanatizmit të egër, që kërcënon jetën
e shumë njerëzve dhe krijon pengesa për ecjen drejt një bote, në të cilën mbretëron
paqja.