U hap sot në Trebizondë
në Turqi procesi gjyqësor në ngarkim të vrasësit 16-vjeçar të meshtarit italian Antonio
Santoro. Seancat do të zhvillohen me dyer të mbyllura. Mbi të pandehurin rëndojnë
akuzat për vrasje me dashje, armëmbajtje pa leje dhe cënim i rendit publik.
Të
paktën nëntë irakianë, katër prej të cilëve mësues, u vranë sot në atentate të ndryshme
në Irak. Ndërsa gjatë natës u sulmua me mortaja baza e ushtarëve britanikë në Amarë.
Mbetën të plagosur katër ushtarë. Deri tani numri i ushtarëve britanikë të vrarë në
Irak është 111.
Bashkimi Evropian është i gatshëm t’i paraqesë Iranit propozime
që u cilësuan si “zemërgjera dhe të guximshme” në fushën e ekonomisë, atë bërthamore
dhe mbase edhe në atë të sigurisë, me kusht që Irani të heqë dorë nga planet e veta
bërthamore.
Ndërkaq sekretari i përgjithshëm i OKB-së Kofi Anan ka hartuar
një plan për zgjidhjen e menjëhershme dhe paqësore të krizës bërthamore iraniane.
“Bashkësia Ndërkombëtare duhet të veprojë sa më shpejt.”- tha Kofi Anan duke iu referuar
propozimeve të fundit evropiane drejtuar Teheranit. Gjithashtu, duke folur për Korenë
e Veriut, Kofi Anan theksoi se çështja bërthamore koreane është urgjente për krejt
Azinë.
Ka gjasa që në ditët e ardhshme Bashkimi Evropian të bllokojë llogaritë
bankare të disa prej përfaqësuesve të regjimit bjellorus. Kështu u shpreh sot Komisarja
e BE-së për marrëdhëniet me jashtë Benita Ferrero-Waldner.
Deri tani armëpushimi
i shpallur nga grupi i “të urtëve” në Mogadisho, Somali nuk është prishur. Marrëveshja
u arrit pas shtatë ditë luftimesh të ashpra që shkaktuan 150 viktima dhe rreth 300
të plagosur.