Më shumë bashkëpunim në luftën kundër terrorizmit dhe në promovimin e zhvillimit:
këtë theksoi imzot Çelestino Miliore në Pallatin e Qelqit
( 12. 05. 06 R. V. )Më shumë bashkëpunim ndërkombëtar në luftën kundër terrorizmit
dhe në promovimin e zhvillimit: këtë theksoi gjatë dy takimeve në Pallatin e Qelqit
në Nju Jork, imzot Çelestino Miliore, Vëzhgues i Përhershëm i Selisë së Shenjtë pranë
Kombeve të Bashkuara.
Shtetet e ndryshme duhet të krijojnë një bashkëpunim
më të ngushtë për t’iu kundërvënë terrorizmit.Këtë nënvizoi kryeipeshkvi Çelestino
Miliore, Vëzhgues i Përhershëm i Zyrës së OKB-së në Nju Jork, duke folur dje në këshillimin
informal të Asamblesë së Përgjithshme mbi strategjitë kundër terrorizmit. Nuk ka
asnjë arsye që mund ta shfajsojë ose ta përligjë terrorizmin, lufta kundër të cilit
është betejë për të fituar zemrat e mendjet e njerëzve – ripohoi me forcë kryeipeshkvi
Miliore në fjalimin e mbajtur me këtë rast dhe në vijim, duke kujtuar se nganjëherë
emigrantët e rinj keqtrajtohen, gjë që i shtyn në prishjen e rendit, kërkoi të gjinden
rrugëzgjidhje të drejta për problemt e tyre ekonomike e shoqërore. Duke i zgjidhur
këto probleme, - nënvizoi imzot Miliore - kombet mund t’i heqin terroristëve oksigjenin
e urrejtes. Më pas prelati shprehu shqetësimin se terroristët mund të shtjenë në
dorë armë të shfarosjes në masë. Tërhoqi kështu vëmendjen e opinionit botëror ndaj
rrezikut bioterroristik që, për fat të keq, vijon të nënvleftësohet. Mbi të gjitha
prelati kujtoi thirrjen e Papës Benedikti XVI drejtuar gjithë njerëzve vullnetmirë
që t’i thellojnë përpjekjet për reflektim, bashkëpunim, dialog e lutje, për ta mundur
terrorizmin, duke ndërtuar bashkëjetesën paqësore të familjes njerëzore. Prelati
mori fjalën edhe në takimin e Komisionit të OKB-së mbi zhvillimin ku, si nënvizoi
nevojën e krijimit të një ekologjie që e vë qenien njerëzore në qendër të shqetësimeve
ambientaliste, propozoi të krijohet një organizëm i ri për mbrojtjen e mjedisit.