25 vjetori i atentatit kundër Gjon Palit II do të përkujtohet nesër me një Meshë solemne
në bazilikën e Shën Pjetrit në Vatikan, ku do të jetë e pranishme shtatorja e Zojës
së Fatimës
( 12. 05. 06
R. V. )25 vjet më parë, Gjon Pali II u qëllua nga Ali Agça në Sheshin e Shën Pjetrit.
Është ende i gjallë kujtimi i emocionit të mbarë njerëzimit, dëshmitar në një histori
faljeje, misteri e devocioni të madh marian. Pak pas orës pesë pasdite, 25 vjet
më parë, Kisha e të pesë kontinenteve e jo vetëm Kisha, u trondit thellë nga një lajm
i jashtzakonshëm: një burrë kishte qëlluar për të vrarë Papën. Sheshi i Shën Pjetrit
më parë e pastaj Poliklinika Gjemeli, u bënë skenat e dramës së atentatit kundër Gjon
Palit II. Kjo ngjarje, që pati jehonë të fuqishme mediatike, duke lënë në kujtesën
kolektive gjurmët e pashlyeshme të një Pape të plagosur për vdekje – u lidh më pas
me historinë e një faljeje edhe më të jashtzakonshme e me një ndërmjetësi tronditëse
të Zojës së Bekuar. E Gjon Pali II qe gjithnjë i bindur se shpëtoi pikërisht përmes
kësaj ndërmjetësie. “Provania Hyjnore më shpëtoi mrekullisht nga vdekja. Ai
që është i vetmi Zot i jetës dhe i vdekjes, Ai vetë ma zgjati këtë jetë, madje në
një farë mënyre, ma dhuroi rishtas. Që na ky çast i përket edhe më tepër Atij”.
Vijoi ta çudiste botën, Gjon Pali II, me atë që ndodhi më 13 maj 1981. Fjalët që
posa i dëgjuam, të shkruara më 17 mars të vitit 2000, janë shkëputur nga testamenti
i Papës Vojtila, publikuar pas vdekjes së Tij, vdekje që, një pasdite me diell deshi
t’ia merrte jetën para kohe “Ipeshkvit të veshur me të bardha”, “Papës së ardhur nga
larg”. Dy relike, të pazakoshme për një Kryebari të Kishës, dëshmojnë ende sot
për ngjarjen që ndodhi atë ditë, kur një plumb tinzar u nis papritmas drejt zemrës
së Gjon Palit II. Fasha e shpuar nga ky plumb i kalibrit nëntë ndodhet sot në Shenjtëroren
e Jasna Gorës. Ndërsa vetë plumbi i cili, nga mjet i vdekjes, u kthye në dhuratë të
kushtuar, u ngërthye në kurorën e Zojës së Fatimës. Më 13 maj 1981, Papa i ri polak
dëshironte t’i fliste turmës së mbledhur në Sheshin e Shën Pjetrit për 90-vjetorin
e Enciklikës ‘Rerum Novarum’ të Leonit XIII e të njoftonte për lindjen e dy organizmave
papnore: Këshillit Papnor të Familjes dhe Institutit të Studimeve për Martesën dhe
Familjen. Atentati e pengoi. Fjalët e pathëna atë ditë, kaluan ndër arkiva. Ky 13
maj tragjik, kurdisja kriminale e të cilit ishte ende e errët, na la si kujtim Gjon
Palin II në mes turmës që qeshte, që brohoriste, që rendte për t’i shtrënguar dorën,
që i zgjaste një fëmijë për ta puthur, ndërsa gryka e zezë e një pistolete ngrihej
mbi kokat e njerëzve. Papa i ri, që kishte shkelur gjysmën e botës, po vdiste
në Poliklinikën Gjemeli të Romës. Pesë orë agonie edhe për Kishën e për botën - orët
e operacionit, që u shndërruan më pas në shpresë e në pritje të rikthimit të Atit
të Shenjtë në gjirin e Kishës. Do të kalonte një muaj para këtij kthimi. Por Gjon
Pali II nuk mund të duronte për një kohë kaq të gjatë larg besimtarëve. Vetëm katër
ditë më pas, të dielën, më 17 maj, duke kapërcyer rregullat e protokolleve shekullore,
kërkoi një mikrofon dhe e tha lutjen e Engjëllit të Tënzot nga krevati i spitalit.
Gjëja e parë që bëri, ishte të falte Ali Agçanë, turkun 22 vjeçar, dora e të cilit,
që e çoi në grykë të varrit, ishte armatosur nga duar misterioze: “Lutem për
vëllaun që më qëlloi të cilin e kam falur me gjithë zemër” Një vit më vonë,
më 13 maj, Gjon Pali II ishte në Fatima për një falënderim të veçantë. Ai nuk dyshoi
kurrë se e kishte shpëtuar Virgjëra që i qe dukur tre barinjve të vegjël më 1917.
E prandaj në Shenjtëroren e Fatimës, përsëriti para gjithë botës, moton, që e shoqëroi
gjithë jetën: “Totus Tuus – “Jam krejt yti, o Nënë!”. E nesër, në sa në Romë do
të kremtohet Dita e dytë e Shtegtarit, organizuar nga Vepra Romake e Shtegtimeve me
rastin e dukjes së parë të Zojës së Bekuar më 1917 dhe të 25-vjetorit të atentatit
kundër Gjon Palit II, Zoja e Fatimës do të jetë në Sheshin e Shën Pjetrit. Nesër
pasdite, duke filluar nga ora 14. 30, një proçesion solemn marian, do ta mbartë shtatoren
shtegtare të Zojës së Fatimës nga Kështjella e Shën Engjëllit në bazilikën e Shën
Pjetrit. Proçesionin do ta kryesojë kardinali Ivan Dias, kryeipeshkëv i Bombeit. Në
orën 17, në bazilikën e Vatikanit, do të kremtohet Mesha, e kryesuar nga Kardinali
Kamilo Ruini në bashkëkremtim me ipeshvij e meshtarë të shumtë.