Romë: Rëndësia e informacionit etikisht korrekt e të vërtetë në marrëdhëniet ndërkombëtare,
është në qëndër të një takimi studimi në Universitetin Papnor Gregorian, që u hap
dje nga kardinali Renato Rafaele Martino. “Informacioni ka shumë përgjegjësi
për mbrojten e drejtësisë ndërkombëtare e të paqes, në një botë ku globalizimi çon
në formimin e rrufeshëm të një opinioni publik përtejkombëtar”. Këtë vuri në dukje
kardinali Martino, kryetar i Këshillave Papnore të Drejtësisë e Paqes dhe të Emigrantëve
e Endacakëve, duke hapur, në Universitetin Gregorian në Romë, punimet e Takimit të
studimit me temë “Etika e informacionit në marrëdhëniet ndërkombëtare”. Takimi mbahet
në kuadrin e nismave të Seminarit të përhershëm të studimeve mbi etikën në marrëdhëniet
ndërkombëtare, themeluar pranë Universitetit Papnor nga senatori Gjuzepe Vedovato,
që të ndjehet më shumë fryma etike në udhëheqje të marrëdhënieve ndërmjet popujve,
me bindjen se mungesa ose kufizimi i vlerave etike çon, në mënyrë të pashmangëshme,
në perëndimin e çdo qytetërimi. Bolivi Temat e mëdha që spikasin në
jetën e Bolivisë vihen në qëndër të vëmendjes në dokumentin përfundimtar të punimeve
të Konferencës Ipeshkvnore vendase. Flitet kryesisht për nacionalizimin e hidrokarbureve,
sipas dëshirës së vetë popullit, shprehur përmes referendumit të vitit 2004. Prelatët
urojnë që një veprim i tillë tepër i rëndësishëm për të ardhmen e vendit, të administrohet
me drejtësi, të mos bjerë përsëri në duar njerëzish të korruptuar dhe që frytet ekonomike
t’i gëzojnë edhe - e sidomos - më të varfërit. Me syrin drejtuar nga Konferenca
V e Episkoptatit latino-amerikan e karaibik, që do të mbahet në vitin 2007 në Brazil,
ipeshkvijtë bolivianë e ftojnë mbarë popullin e Zotit, sidomos laikatin, të marrë
gjallërisht pjesë në të gjitha etapat e kësaj ngjarjeje të madhe kishtare. Çampino Të
përkulen, si Samaritani i Mirë, përballë nevojave të vëllezërve, posaçërisht të
atyre që janë më të varfër e që kanë më shumë mangësi: kjo është ftesa që kardinali
Kreshencio Sepe, prefekt i Kongregatës për Ungjillëzimin e Popujve, e vuri në plan
të parë dje, në Çampino, pranë Romës, duke hapur asamblenë e përgjithshme të Veprave
Papnore Misionare. Në fjalimin e tij, kardinali Sepe citoi Statutin e ri, një tekst
tepër i qartë e i përshtatshëm, që ndihmon në përballimin e problemeve jo të pakta
e të sfidave të situatës aktuale misionare në botë. Prefekti i Kongregatës për Ungjillëzimin
e Popujve vuri theksin mbi temën e bashkimit të katolikëve, duke shpjeguar se kur
shkëmbehen dhurata ndërmjet Kishave, duhet pasur shumë kujdes që mos të ndjehet kurrë
epërsia e atij që dhuron e ligështia e atij që merr. Kardinali Sepe porositi që të
respektohet shkalla e nevojave kishtare e jo aftësia administrative e disave, sepse
kishat duhen trajtuar njëlloj, pa nënvleftësuar asnjërën – tha në përfundim prefekti
i Kongregatës për Ungjillëzimin e Popujve. Poloni Ipeshkvijtë polakë
kanë ngritur një “Këshill” për programimin e transmetimeve të Radio Marisë. Këshilli
ka për detyrë të garantojë vijën baritore të emitentes në përkim me mësimet e Kishës. Kujtojmë
se Radio Maria në Poloni ka qenë kohët e fundi në qëndër të polemikave, për qëndrime
të njëanshme lidhur me grupe të veçanta politike polake. Vatikan Këto
ditë pa dritën e shtypit, vëllimi II i Enchiridionit të Sinodit të Ipeshkvijve,
që përfshin periudhën nga viti 1989 deri më 1995. Në vëllim përmblidhet edhe Sinodi
i posaçëm për Evropën, mbledhur menjëherë pas shembjes së mureve, në të cilin edhe
Shqipëria, pas 50 vjet ateizmi shtetëror, mundi të dërgonte përfaqësuesin e vet. Kujtojmë
se Sinodi i Ipeshkvijve u krijua nga Papa Pali VI 40 vjet më parë, e pikërisht më
15 shtator 1965, dy vjet para se mbi Institucionet fetare të Shqipërisë të shpërthente
stuhia më e tmerrshme e diktaturës.