Ipeshkvijtë e Kanadasë në vizitë ‘ad Limina’ tek Papa. Sfida: ta mposhtin laicizmin
që është përhapur në të katër anët e vendit
( 04. 05. 06 R. V. )Të luftohet laicizmi tepër i përhapur në Kanada, me riungjillëzimin
e dialogun ndërfetar dhe ekumenik: ky është objektivi i ipeshkvijve të vendit veri-amerikan,
që ndodhen për vizitë ‘ad Limina’ në Vatikan. Filluan sot paradite në Vatikan
takimet e ipeshkvijve të Kanadasë me Benediktin XVI. Vizita ‘ad Limina, e prelatëve
veri-amerikanë do të vijojë deri më 15 majin e ardhshëm e do t’u krijojë mundësinë
t’i paraqesin Atit të Shenjtë panoramën kishtare e shoqërore të një kombi të madh
e të larmishëm, në gjirin e të cilit veprimtaria e Kishës për ta rikthyer Krishtin
në zemër të Kanadasë, që po e harron Zotin, ndesh vështirësi jo të pakta. Është
fjala për një veprimtari që shtrihet në një territor prej 10 milion kilometrash katrore,
me tridhjetë milionë banorë, 83 % e të cilëve kristianë, gjysma katolikë. Në një vend
të tillë, vijon me vrull shkristianizimi, i nisur në vitet ’60. Diskutohet për zëvendësimin
e mësimit të besimit me një kurs të etikës e të kulturës fetare, për njohjen ligjore
të çifteve të faktit, për përkufizimin e ri të martesës e deri për klonimin e njeriut.